មហាសេដ្ឋីវៀតណាមត្រូវបានកាត់ទោសប្រហារជីវិតក្នុងសំណុំរឿងឆបោកទំហំ ១២ពាន់លានដុល្លារ
(ហាណូយ)៖ យោងតាមសេចក្តីរាយការណ៍របស់ប្រព័ន្ធផ្សព្វផ្សាយរដ្ឋវៀតណាមបានឲ្យដឹងថា តុលាការប្រទេសវៀតណាមសម្រេចបានកាត់ទោសប្រហារជីវិតមហាសេដ្ឋីអចលនទ្រព្យលោកស្រី Truong My Lan ជុំវិញការចោទប្រកាន់ក្នុងសំណុំរឿងឆបោកហិរញ្ញវត្ថុទំហំ ៣០៤ពាន់ពាន់លានដុង ស្មើនឹង ១២,៤៦ពាន់លានដុល្លារអាមេរិក ដែលជាករណីដ៏ធំបំផុតក្នុងប្រវត្តិសាស្រ្តរបស់ប្រទេសនេះ។
សេចក្តីរាយការណ៍ខាងលើបានបញ្ជាក់ថា លោកស្រី Lan ដែលជាប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat Holdings Group ត្រូវបានគេរកឃើញថាមានពិរុទ្ធពីបទកេងបន្លំ សូកប៉ាន់ និងរំលោភលើច្បាប់ធនាគារនៅពេលបញ្ចប់ការកាត់ក្តី។
សូមជម្រាបថា ដំណើរការកាត់ក្តីដែលបានចាប់ផ្តើមកាលពីថ្ងៃទី០៥ ខែមីនា និងបានបញ្ចប់លឿនជាងការគ្រោងទុកខាងលើនេះ បានធ្វើឡើងក្រោមយុទ្ធនាការប្រឆាំងនឹងអំពើពុករលួយដែលត្រូវបានផ្តួចផ្តើមឡើងដោយមេដឹកនាំបក្សកុម្មុយនិស្តដែលកំពុងកាន់អំណាច លោក Nguyen Phu Trong។
ចាប់តាំងពីយុទ្ធការខាងលើនេះបានចាប់ផ្តើម មន្ត្រីជាន់ខ្ពស់រដ្ឋាភិបាលរាប់រយនាក់ និងនាយកប្រតិបត្តិអាជីវកម្មល្បីៗជាច្រើនក្នុងប្រទេសវៀតណាមត្រូវបានកាត់ទោស ឬបង្ខំឱ្យចុះចេញពីតំណែង។
សូមបញ្ជាក់ថា លោក Lan និងអ្នកសមគំនិតត្រូវបានចោទប្រកាន់ពីបទលួចយកលុយជាង ៣០៤ ពាន់ពាន់លានដុងពីធនាគារ Saigon Joint Stock Commercial (SCB) ដែលលោកស្រីមានលទ្ធភាពគ្រប់គ្រងយ៉ាងមានប្រសិទ្ធភាពក្នុងការអនុញ្ញាតលើដំណើរការនានាតាមរយៈការកាន់កាប់ភាគហ៊ុនមួយផ្នែកធំក្នុងធនាគារនេះ។
ក្រុមអ្នកស៊ើបអង្កេតបាននិយាយថា ចាប់ពីដើមឆ្នាំ២០១៨ ដល់ខែតុលា ឆ្នាំ២០២២ នៅពេលដែលរដ្ឋបានផ្តល់ការគាំទ្រផ្នែកជំនួយហិរញ្ញវត្ថុដល់ SCB ដើម្បីបន្តសេវាប្រាក់បញ្ញើរបស់ខ្លួន លោកស្រី Lan បានទទួលប្រាក់យ៉ាងច្រើនពីការរៀបចំគ្រោងខ្ចីប្រាក់ខុសច្បាប់ដោយប្រើប្រាស់ក្រុមហ៊ុនខ្មោចជាច្រើនដែលលោកស្រី និងបក្ខពួកបានបង្កើតឡើង។
ទោះជាយ៉ាងណាក្តី សមាជិកគ្រួសាររបស់លោកស្រីបានឲ្យដឹងថា លោកស្រី Lan នឹងប្តឹងឧទ្ធរណ៍ចំពោះសាលក្រមខាងលើនេះ៕