ពិធីប្រជុំបូកសរុបលទ្ធផលការងារប្រចាំខែ មិថុនា និងលើកទិសដៅការងារខែ កក្កដា ឆ្នាំ២០១៩ របស់អគ្គនាយកដ្ឋានភស្តុភារ និងហិរញ្ញវត្ថុ
រាជធានីភ្នំពេញ ៖ ថ្ងៃអង្គារ ៨កើត ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី ៩ ខែកក្កដា ឆ្នាំ ២០១៩ នៅសាលប្រជុំអគ្គនាយកដ្ឋានភស្តុភារ និងហិរញ្ញវត្ថុ មានរៀបចំ ពិធីប្រជុំបូកសរុបលទ្ធផលការងារប្រចាំខែ មិថុនា និងលើកទិសដៅការងារខែ កក្កដា ឆ្នាំ២០១៩ របស់អគ្គនាយកដ្ឋានភស្តុភារ និងហិរញ្ញវត្ថុ ក្រោមអធិបតីភាពដ៏ខ្ពង់ខ្ពស់ ឯកឧត្ដម នាយឧត្ដមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ និងមានការអញ្ជើញចូលរួមពីឯកឧត្តម-លោកជំទាវ ដែលជាអគ្គនាយករង និងឯកឧត្តមប្រធាននាយកដ្ឋានចំណុះអគ្គនាយកដ្ឋានភស្តុភារ និងហិរញ្ញវត្ថុ អស់លោក-លោកស្រី នាយ-នាយរងការិយាល័យ និងមន្រ្តីជំនាញពាក់ព័ន្ធផងដែរ ។
ចំពោះទិសដៅការងារសម្រាប់ខែកក្កដាឆ្នាំ ២០១៩
-ជំរុញ និងពន្លឿនគ្រប់បណ្ដានាយកដ្ឋាន អង្គភាព ស្នងការដ្ឋាននគរបាលរាជធានី-ខេត្ត លើកសំណើសុំធានាចំណាយថវិកាទៅក្រសួងសេដ្ឋកិច្ច និងហិរញ្ញវត្ថុ។
-បើកកញ្ចក់ឯកសារដេញថ្លៃអង្ករត្រៀមបម្រុងអន្តរាគមន៍ ផ្គត់ផ្គង់ជូនអង្គភាពប្រមូលផ្ដុំ និងកងកម្លាំងនគរបាលប្រចាំការនៅតំបន់ប្រាសាទព្រះវិហារ។
-ស្នើសុំគោលការណ៍ជូនថ្នាក់ដឹកនាំក្រសួងមហាផ្ទៃ ដើម្បីពិនិត្យសម្រេចលើគម្រោងផែនការចំណូលចំណាយថវិកាសម្រាប់ឆ្នាំ២០២០ និងផែនការយុទ្ធសាស្ត្រថវិកា៣ឆ្នាំរំកិល (២០២០-២០២២) របស់ក្រសួងមហាផ្ទៃ និងឈានទៅប្រជុំឆ្លងកម្រិតជំនាញជាមួយក្រសួងសេដ្ឋកិច្ច និងហិរញ្ញវត្ថុ។
-ផ្គត់ផ្គង់បៀវត្សថ្នាក់ដឹកនាំក្រសួង មន្ត្រីរាជការស៊ីវិល មន្ត្រីពន្ធនាគារ ប្រចាំខែមិថុនា កងកម្លាំងនគរបាលជាតិ ប្រចាំខែកក្កដា និងរបស់ផ្គត់ផ្គង់ជីវភាពជនជាប់ឃុំ ប្រចាំខែឧសភាឆ្នាំ២០១៩។
-បេីកផ្ដល់ប្រេងឥន្ធនៈ អង្ករត្រៀមបំរុងអន្តរាគមន៍ប្រចាំត្រីមាសទី៣ ឆ្នាំ ២០១៩ ជូននាយកដ្ឋាន អង្គភាពចំណុះក្រសួង និងស្នងការដ្ឋាននគរបាលរាជធានីខេត្ត ។
-ត្រៀមផលិតរឿងអប់រំខ្នាតខ្លី ពាក់ព័ន្ធនឹងការរឹតបន្តឹងការអនុវត្តច្បាប់ចរាចរណ៍ផ្លូវគោក ដើម្បីចាក់ផ្សាយតាមកម្មវិធីទូរទស្សន៍មហាផ្ទៃ។
-រៀបចំខ្លឹមសារ និងរូបភាពសម្រាប់ចេញផ្សាយទស្សនាវដ្ដីក្រសួងមហាផ្ទៃលេខ ២១៥-២១៦ និងទស្សនាវដ្ដីមិត្តនគរបាលលេខ៨៧។
-ចុះធ្វើសិក្ខាសាលាស្តីពីសុខភាពនគរបាលនៅស្នងការដ្ឋាននគរបាលខេត្តកំពង់ស្ពឺ និងបញ្ជូនមន្ត្រីជាន់ខ្ពស់ក្រសួងមហាផ្ទៃវគ្គទី ២ ឆ្នាំ២០១៩ ទៅពិនិត្យសុខភាព និងព្យាបាលជម្ងឺនៅសាធារណរដ្ឋសង្គមនិយមវៀតណាម។
-បន្តសាងសង់អគារអធិការដ្ឋានគរបាលខណ្ឌដូនពេញ នគរបាលរដ្ឋបាលឃុំសង្កាត់ អគារស្នាក់នៅ ៧ខ្នង ផ្ទះដាំ-ហូបបាយ៧ខ្នង របស់នាយកដ្ឋាននគរបាលការពារព្រំដែនគោកគម្រោងឆ្នាំ ២០១៩ និងបន្តសាងសង់ជួសជុលសំណង់អគារនានាហេដ្ឋារចនាសម្ព័ន្ធដែលមានគោលការណ៍សម្រេចពីថ្នាក់ដឹកនាំ។
-បន្តសិក្សាស្រាវជ្រាវលក្ខណៈបច្ចេកទេស និងគុណភាពរបស់ឧបករណ៍សម្រាប់បំបែកជញ្ជាំងក្រាស់ៗ សម្រាប់សង្គ្រោះក្នុងករណីមានអគ្គីភ័យឆាបឆេះ។
ក្នុងឱកាសនោះដែរ ឯកឧត្ដម នាយឧត្ដមសេនីយ៍ សេង យូអ៊ាន់ បានមានមតិដឹកនាំ សូមអោយបណ្ដានាយកដ្ឋានទាំងអស់ យកចិត្តទុកដាក់លើការងាររបស់មន្ត្រីក្នុងអង្គភាពរបស់ខ្លួន ចំពោះនាយកដ្ឋានរដ្ឋបាលសរុបត្រូវយកចិត្តចំពោះឯកសារ មុននឹងចេញលិខិតជាផ្លូវការជូនតាមបណ្ដាអង្គភាព ឬថ្នាក់ដឹកនាំអគ្គនាយកដ្ឋាន ហេីយក៏សូមអោយបណ្ដាអង្គភាពទាំងអស់ ដែលបានដាក់ចេញនូវទិសដៅសំរាប់ខែមិថុនានេះ ត្រូវអនុវត្តអភិបាលកិច្ចអោយបាននៅលទ្ធផលសំរាប់ខែកក្កដា ឆ្នាំ២០១៩។
