ឯកឧត្តមកត្តិបណ្ឌិត ពេជ្រ ប៊ុនធិន អញ្ជើញជួបសំណេះសំណាលជាមួយគណៈកម្មការដឹកនាំទូកងទាំង១៥ របស់ខេត្តក្រចេះសម្រាប់ថ្ងៃទី៣ នៃព្រះរាជពិធីបុណ្យអុំទូក
ខេត្តក្រចេះ៖ ថ្ងៃអង្គារ ១រោច ខែកត្ដិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១២ ខែវិច្ឆិកា ឆ្នាំ២០១៩នេះ ឯកឧត្ដមកត្តិបណ្ឌិត ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារថ្នាក់ជាតិចុះមូលដ្ឋានខេត្តក្រចេះ អញ្ជើញជួបសំណេះសំណាល និងនាំយកថវិកាអំណោយ ជូនដល់គណៈកម្មការទូកងទាំង១៥ របស់ខេត្តក្រចេះ នៅបរិវេណកន្លែងស្នាក់នៅក្នុងរាជធានីភ្នំពេញ ដោយមានការចូលរួមពី ឯកឧត្ដម វន សុវណ្ណារី អនុរដ្ឋលេខាធិការ ឯកឧត្ដម អ៊ុយ វិរៈ អនុរដ្ឋលេខាធិការ ក្រសួងមុខងារសាធារណៈ ឯកឧត្តម ប៉ែន លីណាត អភិបាលរងខេត្ត និងជាប្រធានគណៈកម្មាការដឹកនាំគ្រប់គ្រងទូកខេត្តក្រចេះ ។
ឯកឧត្តមកត្តិបណ្ឌិត ពេជ្រ ប៊ុនធិន ក៏បានណែនាំ និងផ្ដាំផ្ញើដល់គណៈកម្មាការ កីឡាករចំណុះទូកទាំង១៥ ត្រូវរក្សាឲ្យបាននូវស្មារតីសាមគ្គីភាព មិត្តភាព ជាមួយកីឡាករក្នុងក្រុម និងគោរពបទបញ្ជារបស់គណៈកម្មការដឹកនាំការប្រកួត ដើម្បីដណ្តើមយកជ័យជំនះលើគូប្រកួតជូនខេត្ត និងចូលរួមក្នុងការរក្សាសន្តិសុខ សុវត្ថិភាព អនាម័យ សណ្តាប់ធ្នាប់ របៀបរៀបរយសាធារណៈ ធ្វើយ៉ាងណាឲ្យពិធីបុណ្យប្រពៃណីមួយនេះប្រព្រឹត្តទៅបានល្អ ៕