លោកស្រី រស់ ផល្លា និងកញ្ញា ដួង ម៉ានិច នាំយកអំណោយ “មូលនិធិនៃ ក្ដីស្រលាញ់” ចែកជូនពលរដ្ឋរងគ្រោះដោយសារទឹកជំនន់ ១៥៨គ្រួសារ នៅស្រុកមង្គលបូរី និងក្រុងសិរីសោភ័ណ
បន្ទាយមានជ័យ ៖ ដេីម្បីជួយដល់ប្រជាពលរដ្ឋដែលកំពុងតែទទួលរងគ្រោះដោយសារតែទឹកជំនន់នៅក្នុងស្រុកមង្គលបូរី “ មូលនិធិនៃ ក្ដីស្រលាញ់ “ ដឹកនាំដោយលោកស្រី រស់ ផល្លា (ហៅម៉ាក់យាយ) កញ្ញា ដួង ម៉ានិច តារាសម្តែងដ៏មានប្រជាប្រិយភាព ដែលមានកំណេីតជាអ្នកស្រុកមង្គលបូរី រួមជាមួយនឹងក្រុមការងារ បានរៀបចំចែកអំណោយសង្គ្រោះបន្ទាន់ជូនពលរដ្ឋរងគ្រោះចំនួន១៥៨គ្រួសារ (ឃុំបន្ទាយនាង២៤ គ្រួសារ, ឃុំគោកបល្ល័ង្គ ៤១គ្រួសារ, ឃុំភ្នំតូច ៧០គ្រួសារ) និង១៥គ្រួសារ ក្នុងក្រុងសិរីសោភ័ណ ទុរគតជន៨គ្រួសារបន្ថែមទៀត។
ការនាំយកអំណោយចែកជូនដល់ពលរដ្ឋរងគ្រោះខាងលេីនេះធ្វេីឡេីងកាលពីពេលកន្លងទៅ ដែលមានការចូលរួមពីថ្នាក់ដឹកនាំស្រុក សមាជិកក្រុមប្រឹក្សាស្រុក អាជ្ញាធរមូលដ្ឋានបានចូលរួមផងដែរ។
នាឱកាសនោះដែរកញ្ញា ដួង ម៉ានិច និងក្រុមការងារបានថ្លែងនូវការចូលរួមសោកស្តាយចំពោះគ្រោះមហន្តរាយធម្មជាតិទឹកជំនន់ កេីតមានឡេីងនៅឆ្នាំ២០២០នេះ ដែលបានធ្វេីឲ្យផ្ទះសំបែងរបស់បងប្អូនពលរដ្ឋរងផលប៉ះពាល់ជាច្រេីន ក្នុងនាមជាអ្នកសិល្បៈមួយរូប កញ្ញាបានធ្វេីការបួងសួងដល់វត្ថុស័ក្តិសិទ្ឋក្នុងលោកជួយថែរក្សាបងប្អូនពលរដ្ឋ ឲ្យជៀសផុតពីគ្រោះធម្មជាតិនាពេលឆាប់ៗខាងមុខនេះ ជាមួយនឹងទឹកចិត្តសប្បុរសធម៌នេះដែរ លោកស្រី រស់ ផល្លា កញ្ញា ដួង ម៉ានិច និងក្រុមការងារ ក៏បានបន្តចុះពិនិត្យមេីលជាក់ស្តែងពីទិដ្ឋភាពទីតាំងភូមិសាស្រ្តក្នុងស្រុកមង្គលបូរី និងបាននាំយកអំណោយចែកជូនដល់បងប្អូនតាមខ្នងផ្ទះ ដែលនៅតំបន់ដាច់ស្រយ៉ាល ព្រមទាំងបានណែនាំដល់បងប្អូនត្រូវប្រុងប្រយ័ត្នចំពោះកូនចៅតូចៗកុំធ្វេសប្រហែសបណ្តែតបណ្តោយឲ្យក្មេងលេងទឹកក្រែងកេីតមានករណីលង់ទឹក និងត្រូវប្រុងប្រយ័ត្នជានិច្ចចំពោះសត្វអសិរពិសជាដេីម។
ទន្ទឹមនឹងនោះកញ្ញា ដួង ម៉ានិច ក៏បានថ្លែងនូវអំណរគុណចំពោះក្រុមការងារ ក៏ដូចជាសប្បុរសជន ដែលបាននាំយកចំណាយជាថវិកា និងសម្ភារៈ ចូលរួមចំណែកជួយដល់ពលរដ្ឋដែលរងគ្រោះដោយគ្រោះទឹកជំនន់ ថែមទាំងបានចូលរួមទាំងកម្លាំងកាយចិត្តក្នុងការចំណាយពេលវេលាចុះចែកអំណោយដោយផ្ទាល់មិនគិតពីភាពនឿយហត់ ហេីយកញ្ញាក៏បានបញ្ជាក់ទៀតថា សម្រាប់កម្មវិធីមនុស្សធម៌នេះ គឺមិនមែនធ្វេីតែនៅពេលនេះទេ គឺធ្វេីជារៀងរហូតក្នុងការជួយដល់ពលរដ្ឋទីទល់ក្រ គ្មានទីពឹងជាដេីម។
គួរបញ្ជាក់ថា ៖ សម្រាប់អំណោយក្នុងមួយគ្រួសារទទួលបាន អង្ករ២០គីឡូក្រាម, មី១កេះ, ទឹកត្រី-ទឹកស៊ីអ៊ីវ២យួរ, ត្រីខ១យួរ, ទឹកសុទ្ធ៣យួរ និងថវិកា១ម៉ឺនរៀល ក្នុងនាមក្រុមការងារ “មូលនិធិនៃ ក្ដីស្រលាញ់ “ ក៏បាននាំយកថវិកា ជូនជនពិការ និងទុរគត់ជន ចាស់ជរា៨គ្រួសារ ក្នុងមួយគ្រួសារទទួលបានថវិកា២៥ម៉ឺនរៀល និងគ្រឿងឧបភោគបរិភោគមួយចំនួនទៀតផងដែរ៕
