អគារថ្មីរបស់ប៉ុស្តិ៍នគរបាលរដ្ឋបាលចំនួន០៣បន្ថែម បានជួយសម្រួលក្នុងការបំពេញការងារប្រចាំថ្ងៃ និងបានផ្ដល់សេវាសំណូមពីបងប្អូនប្រជាពលរដ្ឋកាន់តែឆាប់រហ័ស
កំពង់ចាម៖ នៅព្រឹកថ្ងៃទី១៩ ខែមីនា ឆ្នាំ២០២២ លោកឧត្តមសេនីយ៍ទោ ឯម កុសល ស្នងការនគរបាលខេត្ត បានអញ្ជើញចុះត្រួតពិនិត្យការសាងសង់ ជួសជុល កែលម្អ នូវអគារមួយចំនួនក្នុងស្រុកកោះសូទិន និងស្រុកស្រីសន្ធរ៖
១-ស្រុកកោះសូទិន
+ប៉ុស្ដិ៍នគរបាលរដ្ឋបាលមហាខ្ញូង សាងសងរួចរាល់១០០% មានទំហំ ១១មx៩ម
+ប៉ុស្ដិ៍នគរបាលរដ្ឋបាលព្រែកតានង់ សាងសង់សម្រេចបាន៥០% មានទំហំ ១១មx៩ម
២-ស្រុកស្រីសន្ធរ
+ប៉ុស្ដិ៍នគរបាលរដ្ឋបាលកោះអណ្ដែត សាងសងរួចរាល់១០០% មានទំហំ ១១មx៩ម
+ការត្រៀមបន្តជួសជុលកែលម្អរ ផ្នែកខាងក្នុងនៃអគារអធិការដ្ឋាន ដេីម្បីរៀបចំបង្កឲ្យមានលក្ខណៈជាទម្រង់ សមស្របតាមបណ្ដាផ្នែកជំនាញនីមួយៗ បម្រើការងារ និងទុកដាក់ឯកសារឲ្យបានងាយស្រួល ព្រមមានទាំងរោងសម្រាប់ទុកមធ្យោបាយ សម្ភារៈ បន្ទប់សម្រាករបស់កម្លាំងអន្តរាគមន៍ពិសេស និងរោងអាហារ ជាដេីម ។
សូមបញ្ជាក់ផងដែរថា អគារប៉ុស្ដិ៍ទាំងបីនេះ បានសាងសង់សមស្របតាមបច្ចេកទេសបទដ្ឋានជាទម្រង់របស់ក្រសួងមហាផ្ទៃ និងការជួសជុលកែលម្អអគារអធិការដ្ឋាននេះ ដោយទទួលបានការផ្តួចផ្ដេីមកសាងពីសំណាក់ ឯកឧត្ដម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្ត លោកឧត្តមសេនីយ៍ស្នងការ លោក-លោកស្រីអធិការ-អធិការរង រហូតដល់មន្រ្តី នៃអធិការដ្ឋាននគរបាលស្រុកកោះសូទិន និងស្រុកស្រីសន្ធរ ព្រមទាំងសប្បុរសជននានា ក្នុងនិងក្រៅស្រុក ដែលត្រូវចំណាយអស់ថវិកាប្រមាណ ជាង៧មុឺនដុល្លារអាមេរិច គ្រោងនឹងសម្ពោធឲ្យប្រេីប្រាស់ជាផ្លូវការ នាពេលឆាប់ៗខាងមុខនេះ ។
ក្នុងឱកាសចុះត្រួតពិនិត្យនោះដែរ លោកឧត្តមសេនីយ៍ស្នងការ ក៏បានណែនាំ និងពង្រឹងបន្ថែមអំពីតួនាទីភារកិច្ចរបស់ប៉ុស្តិ៍នគរបាលរដ្ឋបាល ដែលត្រូវអនុវត្តការងារឲ្យមានប្រសិទ្ធភាពខ្ពស់ ព្រមទាំងបាននាំយកអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ នូវថវិកា និងគ្រឿងឧបភោគបរិភោគមួយចំនួន ឧបត្ថម្ភដល់កម្លាំងប៉ុស្តិ៍នគរបាលរដ្ឋបាល ផងដែរ ៕