ប្រមុខការទូតចិនប្រាប់ អាស៊ានគួរចៀសឱ្យឆ្ងាយពីការប្រជែងអំណាចរវាងក្រុមប្រទេសមហាអំណាច
(ប៉េកាំង)៖ នៅថ្ងៃអង្គារ ទី០៧ មីនាដើមសប្តាហ៍នេះ រដ្ឋមន្រ្តីការបរទេសចិន លោក ឈិន កាង (Qin Gang) បានលើកឡើងថា អាស៊ានគួរតែនៅឱ្យឆ្ងាយការប្រកួតប្រជែងអំណាចគ្នា រវាងក្រុមប្រទេសមហាអំណាច ហើយមិនត្រូវដើរតួនាទីជាភ្នាក់ងាររបស់កម្លាំងខាងក្រៅណាមួយឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
ការលើកឡើងរបស់លោក ឈិន (Qin) ខាងលើ គឺជាការឆ្លើយតបចំពោះមតិដែលថា ក្រុមប្រទេសក្នុងតំបន់អាស៊ានកំពុងស្ថិតក្រោមសម្ពាធ ហើយកាន់តែជួបការលំបាកខ្លាំងឡើង ក្នុងការពឹងផ្អែកលើសហរដ្ឋអាមេរិកសម្រាប់ការធានាសន្តិសុខ និងទៅលើចិនសម្រាប់ផ្នែកសេដ្ឋកិច្ច។
លោកប្រមុខការទូតចិនបានបន្តថា យុទ្ធសាស្រ្ត ឥណ្ឌូ-ប៉ាស៊ីហ្វិក របស់សហរដ្ឋអាមេរិក គឺជាការប៉ុនប៉ងបង្កើតបក្ខពួក ដែលនឹងប៉ះពាល់ផលប្រយោជន៍របស់ក្រុមប្រទេសក្នុងតំបន់។
ជាមួយគ្នានេះ លោក ឈិន (Qin) បានកត់សម្គាល់ថា មេដឹកនាំនៃប្រទេសជាច្រើនក្នុងតំបន់ ធ្លាប់បាននិយាយហើយថា អាស៊ានមិនគួរដើរតួនាទីជាកូនអុករបស់ភាគីណាមួយនោះទេ។ រដ្ឋមន្រ្តីការបរទេសចិនរូបនេះបានបន្ថែមទៀតថា ក្នុងនាមជាអ្នកកំណត់សន្តិភាពសម្រាប់ការអភិវឌ្ឍរបស់ពិភពលោក សហរដ្ឋអាមេរិកគួររៀបចំមូលដ្ឋានគ្រឹះ សម្រាប់កិច្ចសហប្រតិបត្តិការឈ្នះ-ឈ្នះ ជាជាងក្តារអុកសម្រាប់ការប្រកួតប្រជែងភូមិសាស្រ្តនយោបាយ។
ជាចុងក្រោយ លោក ឈិន (Qin) បានគូសបញ្ជាក់ថា ពុំគួរមានសង្រ្គាមត្រជាក់ណាមួយ ត្រូវដុតបញ្ឆេះឡើងឡើយ ហើយវិបត្តិដូចជាវិបត្តិនៅអ៊ុយក្រែនបច្ចុប្បន្ន ក៏មិនត្រូវអនុញ្ញាតឱ្យកើតឡើងច្រំដែលនៅក្នុងតំបន់អាស៊ីនោះដែរ៕
