ណាតូ ចាប់ផ្តើមសមយុទ្ធយោធាផ្លូវអាកាសក្នុងទ្រង់ទ្រាយធំបំផុតមិនធ្លាប់មាន
(បែរឡាំង)៖ អង្គការសន្ធិសញ្ញាអាត្លង់ទិកខាងជើង (North Atlantic Treaty Organization) ឫ ណាតូ (NATO) នៅថ្ងៃចន្ទដើមសប្តាហ៍នេះ បានចាប់ផ្តើមការធ្វើសមយុទ្ធកងទ័ពអាកាសក្នុងទ្រង់ទ្រាយធំបំផុតនៅអឺរ៉ុប ដែលមិនធ្លាប់មានពីមុនមក ដើម្បីជាសញ្ញាមួយបង្ហាញពីការរួមសាមគ្គីភាព និងអានុភាពរបស់បក្សសម្ព័ន្ធយោធាលោកខាងលិចមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១២ ខែមិថុនា ឆ្នាំ២០២៣។
សមយុទ្ធយោធា Air Defender 23 ដែលដឹកនាំដោយអាល្លឺម៉ង់ នឹងប្រព្រឹត្តទៅរហូតដល់ថ្ងៃទី២៣ ខែមិថុនា ហើយមានការចូលរួមពីយន្តហោះយោធាចម្រុះប្រភេទសរុបប្រហែល ២៥០គ្រឿង មកពីប្រទេសជាសមាជិកនិងប្រទេសជាដៃគូរបស់ ណាតូ (NATO) រួមមានទាំងជប៉ុននិងស៊ុយអែតផងដែរ សរុបចំនួន ២៥ប្រទេស។
សមយុទ្ធនេះ មានការចូលរួមពីមនុស្សសរុប ១០,០០០នាក់ ដែលមានគោលដៅពង្រឹងសមត្ថភាពធ្វើប្រតិបត្តិការរួមគ្នា ព្រមទាំងការត្រៀមលក្ខណៈ ដើម្បីការពារខ្លួនប្រឆាំងយន្តហោះដ្រូននិងមីស៊ីលគ្រូស ក្នុងករណីមានការវាយប្រហារលើទីក្រុង អាកាសយានដ្ឋាន ឬកំពង់ផែ នៅក្នុងទឹកដីរបស់ សម្ព័ន្ធមិត្ត ណាតូ (NATO)។
គួរបញ្ជាក់ថា សមយុទ្ធ Air Defender ត្រូវបានបង្កើតឡើងកាលពីឆ្នាំ២០១៨ ជាផ្នែកមួយនៃចំណាត់ការឆ្លើយតបរបស់ ណាតូ (NATO) នៅចំពោះមុខការក្រសោបយកឧបទ្វីប គ្រីមៀ របស់អ៊ុយក្រែនពីសំណាក់រុស្ស៊ី កាលពីឆ្នាំ២០១៤។
សម្រាប់ពេលនេះ សង្រ្គាមឈ្លានពានរបស់រុស្ស៊ីនៅអ៊ុយក្រែន បាននាំឱ្យបក្សសម្ព័ន្ធយោធាមួយនេះកាន់តែមានក្តីព្រួយបារម្ភខ្លាំងឡើងបន្ថែមទៀតថាវាអាចនឹងរាលដាលដល់ទឹកដីរបស់ខ្លួន។
ជាមួយគ្នានេះ សង្រ្គាមរុស្ស៊ីនៅអ៊ុយក្រែន ក៏បានជំរុញឱ្យហ្វាំងឡង់និងស៊ុយអែត ដែលធ្លាប់តែប្រកាន់ជំហរអព្យាក្រឹតជាយូរមកហើយ បាននាំគ្នាផ្លាស់ប្តូរជំហ ដោយបានដាក់ពាក្យចូលជាសមាជិករបស់ ណាតូ (NATO) ដូចប្រទេសអឺរ៉ុបភាគច្រើនដែរ ដើម្បីបញ្ចៀសជម្លោះជាមួយរុស្ស៊ី។ ពេលនេះ ហ្វាំងឡង់បានក្លាយជាសមាជិកជាផ្លូវការរួចរាល់ហើយ កាលពីខែមេសាកន្លងទៅ ខណៈដែលសមាជិកភាពរបស់ស៊ុយអែត កំពុងបន្តស្ថិតក្រោមការរង់ចាំអនុម័តពីហុងគ្រីនិងតួកគី។
គួរជម្រាបជូនថា អង្គការសន្ធិសញ្ញាអាត្លង់ទិកខាងជើង (North Atlantic Treaty Organization) ឫ ណាតូ (NATO) បានចាប់កំណើតដំបូងកាលពីឆ្នាំជិត៧៥ឆ្នាំមុន ពោលគឺប៉ុន្មានឆ្នាំប៉ុណ្ណោះក្រោយសង្រ្គាមលោកលើកទី២ និងជាពេលនៃការចាប់ផ្តើមសង្រ្គាមថ្មីមួយទៀត គឺសង្រ្គាមត្រជាក់ ដែលជាការប្រកួតប្រជែងមនោគមន៍វិជ្ជារវាងលោកសេរីដែលមានសហរដ្ឋអាមេរិក និងប្រទេសអឺរ៉ុបខាងលិច ដើម្បីប្រឈមមុខជាមួយមហាអំណាចកុម្មុយនិស្តគឺ សហភាពសូវៀតដែលសព្វថ្ងៃជាប្រទេសរុស្ស៊ី និងប្រទេសអឺរ៉ុបខាងកើត៕
