សហរដ្ឋអាមេរិកទទួលបានសិទ្ធិប្រើប្រាស់មូលដ្ឋានទ័ពក្នុងប្រទេសប៉ាពូអាស៊ីនូវែលហ្គីណេក្រោមកិច្ចព្រមព្រៀងសន្តិសុខ
កាលពីដំណាច់ខែឧសភាកន្លងទៅ សហរដ្ឋអាមេរិក និងប៉ាពូអាស៊ីនូវែលហ្គីណេ បានចុះហត្ថលេខាលើកិច្ចព្រមព្រៀងសន្តិសុខមួយជាមួយគ្នា ដែលកាលណោះ ខ្លឹមសារនៃកិច្ចព្រមព្រៀងនេះ មិនត្រូវបានបញ្ជាក់នោះទេ។ រហូតដល់យប់ថ្ងៃពុធ ទី១៤ មិថុនាកន្លងទៅ ខ្លឹមសារនៃកិច្ចព្រមព្រៀងមួយនេះត្រូវបានទម្លាយដោយសភាប៉ាពូអាស៊ីនូវែលហ្គីណេ ដោយក្នុងនោះបានបញ្ជាក់ថា សហរដ្ឋអាមេរិកទទួលបានសិទ្ធិប្រើប្រាស់ផ្តាច់មុខលើមូលដ្ឋានទ័ពមួយចំនួននៅប៉ាពូអាស៊ីនូវែលហ្គីណេ។
គួរបញ្ជាក់ថា បណ្តាប្រទេសដែនកោះនៅតំបន់ប៉ាស៊ីហ្វិកកំពុងបន្តក្លាយជាទីតាំងយុទ្ធសាស្រ្តនៃការដណ្តើមគ្នារវាងសហរដ្ឋអាមេរិក និងចិន។
កិច្ចព្រមព្រៀងសន្តិសុខរវាង សហរដ្ឋអាមេរិក និង ប៉ាពូអាស៊ីនូវែលហ្គីណេ ត្រូវបានចុះហត្ថលេខាកាលពីដំណាច់ខែឧសភាដោយរដ្ឋមន្រ្តីការបរទេសអាមេរិកលោក អង់តូនី ប៊្លីនខិន (Antony Blinken) និងរដ្ឋមន្រ្តីការពារជាតិប៉ាពូអាស៊ីនូវែលហ្គីណេលោក វីន បាគ្រី ដាគី (Win Bakri Daki)។ តែកាលណោះ ខ្លឹមសារនៃកិច្ចព្រមព្រៀងមួយនេះត្រូវបានភាគីទាំងពីររក្សាទុកយ៉ាងសម្ងាត់ មុននឹងត្រូវបានសភាប៉ាពូអាស៊ីនូវែលហ្គីណេលាតត្រដាងទាំងស្រុងនាយប់ថ្ងៃពុធ ទី១៤ មិថុនា។ យោងតាមខ្លឹមសារដែលសារព័ត៌មាន AFP បានទទួល អាមេរិកមានសិទ្ធិប្រើប្រាស់មូលដ្ឋានទ័ពនៅប៉ាពូអាស៊ីនូវែលហ្គីណេដោយគ្មានការរារាំងដើម្បីដាក់តាំងឧបករណ៍ កន្លែងស្តុក និងសម្ភារៈបរិក្ខារយោធា។
លើសពីនេះ អាមេរិកថែមទាំងមានសិទ្ធិប្រើប្រាស់ផ្តាច់មុខនូវតំបន់មួយចំនួននៃមូលដ្ឋានទ័ពតាមរយៈការសាងសង់ថ្មីដែលអាមេរិកត្រូវការ។ កិច្ចព្រមព្រៀងសន្តិសុខនេះអនុញ្ញាតឲ្យអាមេរិកបញ្ជូនទ័ពទៅឈរជើង និងបញ្ជូននាវាចម្បាំងទៅចតនៅទីកន្លែងគន្លឹះ ដូចយ៉ាងនៅមូលដ្ឋានទ័ពជើងទឹក ឡូមប្រ៊ាំ (Lombrum) នៅកោះ ម៉ានុស (Manus) និងនៅកំពង់ផែមួយស្ថិតក្នុងទីក្រុង។
គួរបញ្ជាក់ថា អាមេរិកកំពុងព្យាយាមទាក់ទាញបណ្តាប្រទេសជាកោះនៅប៉ាស៊ីហ្វិកតាមរយៈការលើកទឹកចិត្តផ្នែកការទូត និងហិរញ្ញវត្ថុ។ ក្នុងនាមជាកោះមួយដែលសម្បូរធនធានធម្មជាតិ និងស្ថិតក្បែរផ្លូវសមុទ្រសំខាន់ៗ ប៉ាពូអាស៊ីនូវែលហ្គីណេបានក្លាយជាទីតាំងយុទ្ធសាស្រ្តនៃការប្រជែងកម្លាំងគ្នារវាងអាមេរិក និងចិន។
ទោះបីជាចិនមិនអាច ឬមិនទាន់អាចអូសទាញប៉ាពូអាស៊ីនូវែលហ្គីណេមែន តែចិនអូសទាញបានកោះសាឡូម៉ុងដែលជាកោះក្បែរខាងប៉ាពូអាស៊ីនូវែលហ្គីណេ ដោយកាលពីឆ្នាំ២០២២ ចិនបានចុះហត្ថលេខាលើកិច្ចព្រមព្រៀងសន្តិសុខជាមួយកោះសាឡូម៉ុង ហើយតាមរយៈកិច្ចព្រមព្រៀងមួយនេះ ចិនក៏អាចបញ្ជូនទ័ពទៅដាក់នៅក្នុងទឹកដីសាឡូម៉ុងបានផងដែរ៕