ចិន និង ស្វីស ចុះហត្ថលេខាលើសេចក្តីប្រកាសរួមមួយដែលមានគោលដៅពង្រីកពាណិជ្ជកម្មទ្វេរភាគី
(ហ្សឺណែវ)៖ នៅថ្ងៃចន្ទដើមសប្តាហ៍នេះ រដ្ឋាភិបាលស្វីសបាននិយាយថា ខ្លួន និងចិន បានចុះហត្ថលេខាលើសេចក្តីប្រកាសរួមមួយដោយយល់ព្រមក្នុងការពង្រឹងភាពជាដៃគូ បន្ទាប់ពីជំនួបរវាងនាយករដ្ឋមន្ត្រីចិន លោក លី ឈាំង (Li Qiang) ជាមួយប្រធានាធិបតីស្វីស លោកស្រី វីអូឡា អាមហឺដ (Viola Amherd)។ នេះបើតាមការចុះផ្សាយដោយសារព័ត៌មាន Reuters នៅថ្ងៃចន្ទ ទី១៥ មករា ឆ្នាំ ២០២៤។
សូមជម្រាថា នាយករដ្ឋមន្ត្រីចិន លី ឈាំង (Li Qiang) គឺជាឥស្សរជនជាន់ខ្ពស់បំផុតរបស់ចិនដំបូងគេដែលបានទៅបំពេញទស្សនកិច្ចនៅប្រទេសស្វីសចាប់តាំងពីទស្សនកិច្ចរបស់ប្រធានាធិបតីចិន លោក ស៊ី ជីនពីង (Xi Jinping) ក្នុងឆ្នាំ ២០១៧ ហើយជំនួបរវាងគណៈប្រតិភូជាន់ខ្ពស់ចិនជាមួយប្រធានាធិបតីស្វីសខាងលើនេះ គឺត្រូវបានធ្វើឡើងនៅមុនវេទិកាសេដ្ឋកិច្ចពិភពលោកនៅទីក្រុង ដាវូស (Davos) ដែលប្រព្រឹត្តិទៅចាប់ពីថ្ងៃទី ១៥ ដល់ថ្ងៃទី ១៩ ខែមករា ឆ្នាំ២០២៤។
សេចក្តីប្រកាសរួមខាងលើនេះ មានបញ្ចូលជាមួយការបញ្ចប់ការសិក្សារួមដើម្បីអភិវឌ្ឍកិច្ចព្រមព្រៀងពាណិជ្ជកម្មសេរីដែលមានស្រាប់របស់ប្រទេសទាំងពីរ ហើយរដ្ឋាភិបាលស្វីសបាននិយាយថា “នេះជាជំហានដ៏សំខាន់មួយឆ្ពោះទៅរកការចាប់ផ្តើមការចរចាដែលអាចធ្វើទៅបាន”។
គួរបញ្ជាក់ថា ប្រទេសចិនគឺជាដៃគូពាណិជ្ជកម្មធំជាងគេទី ៣របស់ប្រទេសស្វីស បន្ទាប់ពីសហរដ្ឋអាមេរិក និងសហភាពអឺរ៉ុប ហើយប្រទេសទាំងពីរបានចុះហត្ថលេខាលើកិច្ចព្រមព្រៀងពាណិជ្ជកម្មសេរីកាលពីឆ្នាំ ២០១៣ ដែលកាលណោះ វាគឺជាកិច្ចព្រមព្រៀងដំបូងរបស់ទីក្រុងប៉េកាំងជាមួយនឹងសេដ្ឋកិច្ចនៅទ្វីបអឺរ៉ុប។
យ៉ាងណាមិញ កន្លងមក កិច្ចខិតខំប្រឹងប្រែងដើម្បីធ្វើឱ្យកិច្ចព្រមព្រៀងមានភាពល្អប្រសើរ បានជួបភាពជាប់គាំងចំពេលមានរបាយការណ៍ពីការព្រួយបារម្ភអំពីកំណត់ត្រាសិទ្ធិមនុស្សរបស់ប្រទេសចិន ហើយកិច្ចសន្ទនារវាងក្រសួងការបរទេសស្វីស និងចិននឹងបន្តឡើងវិញនៅក្នុងឆ្នាំនេះ ជាមួយនឹងគម្រោងក្នុងការដាក់បញ្ចូលបញ្ហាសិទ្ធិមនុស្សទៅក្នុងរបៀបវារៈនៃកិច្ចចរចានេះផងដែរ។
ជាមួយគ្នានេះ សេចក្តីថ្លែងការណ៍របស់រដ្ឋាភិបាលស្វីសបានឲ្យដឹងថា លោក លី (Li) និងលោកស្រី អេមហឺដ (Amherd) ក៏បានពិភាក្សាអំពីសង្គ្រាមរបស់រុស្ស៊ីនៅអ៊ុយក្រែន និងជម្លោះអ៊ីស្រាអែល-ហាម៉ាសផងដែរ៕