លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលកម្ពុជាលើកឡើងពីហានិភ័យ និងវិធីថែទាំសុខភាពក្នុងគ្រាដែលរលកកម្ដៅឡើងដល់កម្រិតបំបែកកំណត់ត្រា
នៅថ្ងៃពុធសប្តាហ៍នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជាបានលើកឡើងដោយព្រមានពីហានិភ័យចំពោះសុខភាព ខណៈដែលសីតុណ្ហភាពក្នុងប្រទេសកម្ពុជាបានកើនឡើងដល់កម្រិតខ្ពស់បំផុត។
ក្នុងការលើកឡើងខាងលើ លោកជំទាវវេជ្ជបណ្ឌិតបានជំរុញឱ្យប្រជាពលរដ្ឋមានការប្រុងប្រយ័ត្ន និងថែរក្សាសុខភាពកុំឱ្យខ្វះជាតិទឹកក្នុងខ្លួន ដោយនាំគ្នាពិសារទឹកឱ្យបានច្រើន ហើយលោកស្រីបានគូសបញ្ជាក់ថា សីតុណ្ហភាពក្នុងពេលបច្ចុប្បន្ននេះគឺជាកម្រិតក្តៅបំផុតមិនធ្លាប់មានក្នុងប្រវត្តិសាស្ត្ររបស់ប្រទេសកម្ពុជាដោយតំបន់ខ្លះអាចឡើងដល់ ៤៦អង្សារឯណោះ។
រៀបរាប់ក្នុងបង្ហោះមួយនៅថ្ងៃពុធនេះ លោកជំទាវវេជ្ជបណ្ឌិតបានមានប្រសាសន៍ថា “ខ្ញុំសូមអំពាវនាវឱ្យប្រជាពលរដ្ឋមានការប្រុងប្រយ័ត្ន និងមិនត្រូវស្ថិតនៅក្រោមពន្លឺព្រះអាទិត្យយូរពេកនោះទេដើម្បីជៀសវាងបញ្ហារលាកស្បែក ការបែកញើសច្រើន និងការខ្វះជាតិទឹក”។
លោកជំទាវបានបន្តថា “កម្ដៅខ្លាំងអាចបណ្ដាលឲ្យមានការពិបាកដកដង្ហើម ឬដួលសន្លប់ គាំងបេះដូង និងអាចរហូតដល់ថ្នាក់ស្លាប់ទៀតផង”។
លោកជំទាវបានអំពាវនាវឲ្យប្រជាពលរដ្ឋនាំគ្នាស្នាក់នៅទីកន្លែងដែលមានម្លប់ដូចជាក្នុងផ្ទះ ឫក្នុងអគារ ហើយប្រសិនបើមានអារម្មណ៍ថាក្តៅខ្លាំង សូមប្រើកន្សែងសើម ឬក្រមាដើម្បីគ្របខ្លួន ហើយផឹកទឹកឲ្យបានពី ២ ទៅ ៣លីត្រក្នុងមួយថ្ងៃ។
ជាមួយគ្នានេះ លោកជំទាវក៏បានណែនាំឲ្យប្រជាពលរដ្ឋស្លៀកពាក់ស្រាលៗ និងដៃវែង ហើយប្រើឡេការពារកម្តៅថ្ងៃ ឬឆ័ត្រដើម្បីការពារខ្លួនពីពន្លឺព្រះអាទិត្យផងដែរ។
លោកជំទាវបានបន្ថែមទៀតថា ប្រសិនបើនៅក្នុងផ្ទះ ឬអគារ អ្នកអាចប្រើប្រាស់កង្ហារ ឬម៉ាស៊ីនត្រជាក់ ដើម្បីកាត់បន្ថយកំដៅ និងជៀសវាងការទទួលទានផ្អែមពេក ប្រៃពេក ឬខ្លាញ់ពេក។
ដោយឡែក ឯកឧត្តម ចាន់ យុត្ថា អ្នកនាំពាក្យ និងជារដ្ឋលេខាធិការក្រសួងធនធានទឹក និងឧតុនិយម បានឲ្យដឹងថា កាលពីសប្តាហ៍កន្លងទៅ ប្រទេសកម្ពុជាបានកត់ត្រាពីសីតុណ្ហភាពខ្ពស់បំផុតមិនធ្លាប់មានក្នុងរដូវក្ដៅនេះក្នុងរយៈពេលប្រហែល ១៧០ឆ្នាំកន្លងមកនេះ។
យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម សីតុណ្ហភាពក្នុងខេត្តមួយចំនួននៅភាគខាងជើង ឦសាន ភាគពាយ័ព្យ កណ្តាល និងភាគខាងត្បូងនៃប្រទេសបានឡើងដល់ ៤៣អង្សាសេនៅថ្ងៃពុធនេះ ហើយសីតុណ្ហភាពដែលស្ថិតក្នុងកម្រិតប្រកាសអាសន្ននេះនឹងបន្តរហូតដល់ថ្ងៃព្រហស្បតិ៍ និងថ្ងៃសុក្រសប្តាហ៍នេះ។
ជាមួយគ្នានេះ ឯកឧត្តម ចាន់ យុត្ថា បានឲ្យដឹងថា សីតុណ្ហភាពនឹងចាប់ផ្តើមធ្លាក់ចុះវិញនៅដើមខែឧសភានេះ ដោយសារមានការព្យាករណ៍ថានឹងមានភ្លៀងធ្លាក់៕