Honda ប្តេជ្ញាសម្រេចគោលបំណងពីរសម្រាប់កម្ពុជា
លោកKeisuke Honda បានក្លាយជាអ្នកចាត់ការក្រុមបាល់ទាត់ជម្រើសជាតិកម្ពុជា កាលពីខែសីហា ឆ្នាំ២០១៨ ហើយដែលធ្លាប់បានដឹកនាំកម្ពុជា ឲ្យឆ្លងផុតវគ្គជម្រុះបឋមតំបន់អាស៊ី នៃ FIFA World Cup 2022 ដោយយកឈ្នះប៉ាគិស្ថាន ៤-១ (សរុបទាំង២ជើង) បានថ្លែងទៅកាន់ក្រុមបាល់ទាត់ជម្រើសជាតិកម្ពុជា កាលពីឆ្នាំ២០១៨ ពីគោលបំណងរបស់លោកនៅពេលដែលលោកក្លាយជាអ្នកចាត់ការនៃក្រុមបាល់ទាត់ជម្រើសជាតិកម្ពុជា គឺទី១ ដើម្បីបង្កើតរបៀបលេងដ៏ច្បាស់លាស់មួយនិងទី២ ចង់ផ្សព្វផ្សាយពីប្រទេសកម្ពុជា ទៅកាន់ពិភពលោក៖
«អ្វីដែលជាគោលបំណងរបស់ខ្ញុំ គឺចង់បង្កើត Style លេងឲ្យបានច្បាស់លាស់ដល់កម្ពុជា។ ខ្ញុំទទួលស្គាល់ថា សូម្បីនៅជប៉ុនក៏មានលំបាកនៅឡើយដែរ តែយើងត្រូវធ្វើឲ្យមានគោលបំណងតែមួយ។ បេសកកម្មទី២ គឺ គោលដៅមិនមែនដើម្បីតែបាល់ទាត់ប៉ុណ្ណោះទេ ប៉ុន្តែគឺចង់ផ្សព្វផ្សាយអ្វីល្អៗរបស់កម្ពុជាដែរ។ ខ្ញុំចង់ផ្សព្វផ្សាយអ្វីដែលខ្ញុំចាប់អារម្មណ៍ អ្វីៗល្អច្រើន ដូចជាវប្បធម៌ បេតិកភណ្ឌពិភពលោក និងកសិកម្ម ទៅកាន់ពិភពលោក»។
មកទល់នឹងពេលនេះគោលបំណងរបស់លោកហាក់លេចចេញរូបរាងបន្ដើរៗដែលគេសង្កេតឃើញថាសារព័ត៌មានអន្តរជាតិបានចុះផ្សាយក្រុមបាល់ទាត់ជម្រើសជាតិកម្ពុជា និងអ្វីដែលគួរអោយកត់សម្គាល់គឺលទ្ធផលនៃការប្រកួតថ្មីៗទទួលបានជោគជ័យលើសពីការរំពឹងទុក។
លោកបានបញ្ជាក់បន្ថែមនូវអ្វីដែលលោកចង់សម្រេចបានចំពោះភារកិច្ចជាអ្នកចាត់ការរបស់ក្រុមបាល់ទាត់ជម្រើសកម្ពុជាថា៖លោកនឹងជំរុញឲ្យយុវជន មានសេចក្ដីក្លាហាន និងផ្ដល់កម្លាំងចិត្តឲ្យពួកគេតាមរយៈបាល់ទាត់ ដើម្បីស្វែងរកអនាគតដ៏ភ្លឺស្វាងដល់ពួកគេ។
