សាខាកាកបាទក្រហមខេត្តកំពតបន្តប្រគល់ជូនអំណោយមនុស្សធម៌ដល់អនុសាខាក្រុង ស្រុកទាំង៨ក្នុងខេត្តលើកទី៤ ក្នុងគោលដៅប្រយុទ្ធប្រឆាំងជំងឺកូវីត១៩
ខេត្តកំពត ៖ ឯកឧត្តម ជាវ តាយ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពត និងសមាជិក សមាជិកាសាខាកាកបាទក្រហមខេត្ត នៅព្រឹកថ្ងៃសុក្រ១៥កើត ខែជេស្ឋ ឆ្នាំ ជូត ទោស័ក ព.ស ២៥៦៤ ត្រូវនឹងថ្ងៃទី០៥ ខែមិថុនា ឆ្នាំ២០២០ បានអញ្ជើញក្នុងពិធីប្រគល់អំណោយមនុស្សធម៌របស់សាខាកាកបាទក្រហមកម្ពុជាខេត្ត ជូនដល់អនុសាខាកាកបាទក្រហមក្រុង ស្រុកទាំង៨ក្នុងខេត្តជាលើកទី៤បន្តទៀត ដើម្បីយកទៅចែកចាយបន្តជូនដល់រដ្ឋបាលឃុំ សង្កាត់និងបងប្អូនប្រជាពលរដ្ឋក្នុងគោលដៅនៃស្ថានភាពប្រយុទ្ធប្រឆាំងនឹងជំងឺកូវីដ១៩ តាមមូលដ្ឋានក្នុងស្រុក ក្រុងនីមួយៗរបស់ខេត្តកំពត។
មានប្រសាសន៍ក្នុងឱកាសនោះឯកឧត្តមជាវ តាយ ប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំមកនូវការផ្តាំផ្ញើសាកសួរសុខទុក្ខ នូវក្ដីនឹករលឹក ពីសំណាក់សម្ដេចតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា សម្ដេចគតិព្រឹទ្ធបណ្ឌិតប៊ុន រ៉ានី ហ៊ុន សែនប្រធានកាកបាទក្រហមកម្ពុជា ជូនដល់មន្ត្រីអនុសាខាក្រុង ស្រុក យុវជនកាកបាទក្រហមកម្ពុជានិងមន្ត្រីរាជការកងកម្លាំងប្រដាប់អាវុធ ក្នុងខេត្តទាំងអស់ ដែលតែងតែបានខិតខំយកចិត្តទុកដាក់អស់កម្លាំងកាយចិត្ត ក្នុងស្មារតីចូលរួមសកម្មភាពមនុស្សផល ជួយផ្គត់ផ្គង់ជីវភាពខ្វះខាតការលំបាកនិងផ្សព្វផ្សាយ អប់រំដល់បងប្អូនប្រជាពលរដ្ឋ អំពីវិធានការការពារនិងទប់ស្កាត់ជំងឺកូវីដ១៩នៅតាមបណ្ដាមូលដ្ឋាននានាក្នុងខេត្តនាពេលកន្លងមកប្រកបដោយភាពផុសផុល។
ឯកឧត្តមជាវ តាយ បានលើកបញ្ជាក់ថា ជំងឺកូវីដ១៩ ដែលជាជំងឺសកល ពេលបច្ចុប្បន្ននេះនៅតែកំពុងរីករាលដាលនៅបណ្ដាប្រទេសមួយចំនួនក្នុងពិភពលោកស្ទើរជារៀងរាល់ថ្ងៃនិយាយជារួម និងនិយាយដោយឡែកសម្រាប់ប្រទេសកម្ពុជាយើង គឺអាចចាត់ទុកថាជាប្រទេសមានភ័ព្វសំណាង ដោយមានការប៉ះពាល់តិចតួច ក្នុងតំបន់ក៏ដូចក្នុងពិភពលោកដែលក្នុងនោះ កម្ពុជាយើងមានអ្នកឆ្លងជំងឺកូវីដ១៩ ។
ឯកឧត្តម ជាវ តាយ ប្រធានគណៈកម្មាធិការសាខាកាកបាទក្រហមខេត្តកំពត ក៏បានសំណូមពរ ផ្ដាំផ្ញើដល់មន្ត្រីអនុសាខាកាកបាទក្រហមក្រុង ស្រុកក្នុងខេត្តទាំងអស់ បន្ទាប់ពីទទួលបាននូវអង្ករនិងសម្ភារៈបរិក្ខារវេជ្ជសាស្រ្ត ពីពេលនេះតទៅត្រូវបន្តយកទៅចែកចាយជូនដល់មូលដ្ឋានគោលដៅរបស់ខ្លួន ដើម្បីសម្រាលការលំបាកខ្វះខាត របស់ប្រជាពលរដ្ឋនិងរួមគ្នាទប់ស្កាត់ការឆ្លងជំងឺដ៏កាចសាហាវនេះឲ្យមានប្រសិទ្ធភាពថែមទៀតនៅក្នុងខេត្តកំពត។
អំណោយដែលត្រូវបែងចែកជូនសម្រាប់ដល់ អនុសាខាកាកបាទក្រហមក្រុងស្រុក និងភូមិទាំងអស់រួមមាន៖ អង្ករចំនួន ៨ តោន អាល់កុលចំនួន ៧២៨លីត្រ ជែលអាកុលចំនួន ១៦០ដប ម៉ាស ៤៨៨ ប្រអប់ ខិតប័ណ្ណអប់រំ ៨០០ សន្លឹក សាប៊ូដុំ ២០០ដុំ ៕
