ពាណិជ្ជកម្មរវាងកម្ពុជាជាមួយបណ្តាប្រទេសជាសមាជិកអាស៊ានផ្សេងទៀតមានការកើនឡើង ១៨,៦ភាគរយក្នុងត្រីមាសទីមួយ
យោងតាមរបាយការណ៍របស់ក្រសួងពាណិជ្ជកម្មកម្ពុជាដែលចេញផ្សាយនៅថ្ងៃព្រហស្បតិ៍នេះបានឲ្យដឹងថា ពាណិជ្ជកម្មរវាងកម្ពុជាជាមួយបណ្តាប្រទេសជាសមាជិកផ្សេងទៀតរបស់អាស៊ានក្នុងត្រីមាសទីមួយ ឆ្នាំ២០២៤នេះមានទំហំសរុប ៤,៣២ពាន់លានដុល្លារ កើនឡើង ១៨,៦ភាគរយពីទំហំ ៣,៦៤ពាន់លានដុល្លារក្នុងរយៈពេលដូចគ្នាកាលពីឆ្នាំ២០២៣។
របាយការណ៍នេះបានបញ្ជាក់ថា ការនាំចេញផលិតផលសរុបរបស់កម្ពុជាទៅកាន់ប្រទេសសមាជិកអាស៊ានសរុបមានទំហំ ១.៧៧ពាន់លានដុល្លារគិតចាប់ពីខែមករាដល់ខែមីនាឆ្នាំនេះ ដោយមានការកើនឡើង ៣៣ភាគរយពីទំហំ ១.៣៣ពាន់លានដុល្លារក្នុងរយៈពេលដូចគ្នាកាលពីឆ្នាំ២០២៣។
ទន្ទឹមគ្នានេះ ការនាំចូលរបស់កម្ពុជាពីប្រទេសសមាជិកអាស៊ានមានទំហំសរុប ២.៥៥ពាន់លានដុល្លារ កើនឡើង ១០.៣ភាគរយពីទំហំ ២.៣១ពាន់លានដុល្លារក្នុងរយៈពេលដូចគ្នាកាលពីឆ្នាំ២០២៣។
របាយការណ៍ដដែលនេះបានឲ្យដឹងថា ប្រទេសសមាជិកអាស៊ានដែលជាដៃគូពាណិជ្ជកម្មធំបំផុតចំនួន ០៣របស់កម្ពុជារួមមាន វៀតណាម ថៃ និងសិង្ហបុរី។
សូមរំលឹកថា ក្នុងវេទិកាធុរកិច្ចកម្ពុជា-អាស៊ានកាលពីដើមខែមេសានេះ សម្តេចមហាបវរធិបតី លោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា កម្ពុជាឈរក្នុងនាមជាដៃគូដ៏រស់រវើកក្នុងតំបន់អាស៊ាន។ សមាជិកភាពជាយុទ្ធសាស្ត្ររបស់កម្ពុជានៅក្នុងកិច្ចព្រមព្រៀងពាណិជ្ជកម្មសំខាន់ៗទាំងក្នុងតំបន់ និងក្នុងពិភពលោកដែលរួមមានដូចជាអាស៊ាន និងអង្គការពាណិជ្ជកម្មពិភពលោក (WTO) ជាដើមនោះ បានកំណត់តួនាទីរបស់កម្ពុជាក្នុងនាមជាតួអង្គដ៏សំខាន់មួយនៅក្នុងទីផ្សារពិភពលោកដែលប្រកបដោយថាមពល។
ជាមួយគ្នានេះ សម្តេចបានបន្តថា ផលិតផលដែលផលិតក្នុងប្រទេសកម្ពុជាដូចជា សម្លៀកបំពាក់ និងកង់ជាដើម សុទ្ធតែត្រូវបានគេទទួលស្គាល់ទាំងក្នុងតំបន់អាស៊ាន និងទូទាំងពិភពលោកសម្រាប់គុណភាព និងតម្លៃប្រកួតប្រជែង។
សូមបញ្ជាក់ថា បច្ចុប្បន្នបណ្តាប្រទេសជាសមាជិកផ្លូវការរបស់អាស៊ានរួមមាន ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ហើយក្នុងពេលអនាគតខាងមុខ ប្រទេសទីម័រខាងកើត ក៏នឹងក្លាយជាសមាជិកពេញសិទ្ធិរបស់ប្លុកនេះផងដែរ៕