ពលរដ្ឋនៅតាមស្រុកស្រែជនបទ មួយចំនួននៅតែបន្តមានជំនឿ ប្រារព្ធពិធី “ឡើងតា ឬ ឡើងអ្នកតា” បន្ទាប់ពីបញ្ចប់ថ្ងៃចូលឆ្នាំថ្មី ដើម្បីសុំសេចក្តីសុខ
បន្ទាយមានជ័យ ៖ ទំនៀមទំលាប់ និងជំនឿ ដែលមានតាំងពីដូនតាមកស្ទើរនឹងតែបាត់បង់ហើយនោះ តែត្រូវបានប្រជាពលរដ្ឋមួយចំនួនតូចនៅតែគោរពនិងមានជំនឿ ជាក់ស្តែងប្រជាពលរដ្ឋរស់នៅភូមិខ្លែងពណ៌ជើង ឃុំស្លក្រាម ស្រុកស្វាយចេក ខេត្តបន្ទាយមានជ័យ តែងតែមានការរៀបចំប្រារព្ធពិធីនេះជារៀងរាល់ឆ្នាំ ដែលអ្នកភូមិនៅទីនោះនិយមហៅថា “ពិធីឡើងតា ឬ ឡើងអ្នកតា” បន្ទាប់ពីបញ្ចប់នៃពិធីបុណ្យចូលឆ្នាំថ្មីប្រពៃណីជាតិ ពោលគឺបន្ទាប់ពីពិធីត្រាស់នៅតាមទីវត្តអារាម ឬត្រាស់ភូមិ ដែលគេជ្រើសរើសនូវពេលវេលាសមស្របណាមួយ ដើម្បីរៀបចំនូវសំណែន សែនព្រេន ដោយមានក្បាលជ្រូក មាន់ស្ងោរ នំ ចំណី បង្អែម ចំអាមផ្សេងៗ ដើម្បីសែនព្រេន ដល់អារុក្ខអារក្ស អ្នកតា សុំសេចក្តីសុខចម្រើនដល់កូនចៅនៅក្នុងភូមិឋាន ។
បើតាមការបញ្ជាក់ពីចាស់ព្រឹទ្ធាចារ្យម្នាក់ រស់នៅក្នុងភូមិខាងលើ បានឱ្យដឹងថា ៖ នៅពេលចប់ពីធីបុណ្យចូលឆ្នាំ គឺនិងជិតដល់រដូវដាំដំណាំ ធ្វើស្រែ ចម្ការផ្សេងៗ អ្នកភូមិតែងតែនាំគ្នារៀបចំពីធីដង្ហែរគ្រឿងសំណែនផ្សេងៗ ទៅកាន់ខ្ទមអ្នកតានិងរាំជុំវិញខ្ទម ដែលតាំងនៅក្នុងភូមិ ដើម្បីសែនព្រេន បន់ស្រន់ អារុក្ខអារក្ស អ្នកតា ជាម្ចាស់ទឹកដី ព្រៃភ្នំដែលថែរក្សាភូមិឋាន ដើម្បីសុំសេចក្តីសុខចម្រុងចម្រើន សុំឱ្យមានទឹកមានភ្លៀងគ្រប់គ្រាន់ ពិសេសឱ្យការបង្កបង្កើនផលដំណាំផ្សេងៗទទួលបានទិន្នផលខ្ពស់ ក៏ដូចជាបណ្តេញនូវគ្រោះឧបទ្រពចង្រៃទាំងឡាយទាំងពួងចេញពីមូលដ្ឋាន ដោយនាំមកនូវភាពសុខសប្បាយដល់អ្នកភូមិ ។
សូមបញ្ជាក់ផងដែរថា ពិធី “ ឡើងតា ឬឡើងអ្នកតា” នេះត្រូវបងប្អូនប្រជាពលរដ្ឋនៅមូលដ្ឋានខាងលើ តែងតែប្រារព្ធធ្វើជារៀងរាល់ឆ្នាំមិនដែលអាក់ខានម្ដងណាឡើយ។ ដោយពួកគាត់តែងតែមានជំនឿថា នៅពេលបងប្អូនពលរដ្ឋណាម្នាក់ឈឺស្កាត់ផ្សេងៗ ឬក៏មានបញ្ហាផ្សេងៗ ទាក់ទងនិងជំនឿ អ្នកភូមិតែងធ្វើការបន់ស្រន់ដល់អារុក្ខអារក្ស អ្នកតាដែលនៅមានជំនឿ ប៉ុន្តែអ្នកភូមិខ្លះក៏មិនសូវមានការរៀបចំធ្វើនោះទេ មានតែមួយចំនួនតូចតែប៉ុណ្ណោះ ដែលមានការរៀបចំពីធីនេះ ហើយការរៀបចំនេះទៅតាមតំបន់ដែលអ្នកភូមិមានជំនឿទៅលើ អារុក្ខអារក្ស អ្នកតាម្ចាស់ស្រុក៕
