រដ្ឋាភិបាលថៃគ្រោងដំឡើងប្រាក់ឈ្នួលគោលអប្បបរមាប្រចាំថ្ងៃដល់ ៤០០បាតក្នុងខែតុលា
(បាងកក)៖ យោងតាមការបញ្ជាក់ពីសំណាក់អ្នកនាំពាក្យរដ្ឋាភិបាលថៃនៅថ្ងៃព្រហស្បតិ៍នេះបានឲ្យដឹងថា រដ្ឋាភិបាលថៃគ្រោងនឹងដំឡើងប្រាក់ឈ្នួលគោលអប្បបរមាប្រចាំថ្ងៃដល់ ៤០០បាត ឫ ១០,៨៤ដុល្លារអាមេរិកចាប់ពីខែតុលាខាងមុខ ដោយលើកឡើងថានេះគឺជាគោលនយោបាយដែលអាចជួយលើកកម្ពស់ដល់ការប្រើប្រាស់ក្នុងស្រុកនៃប្រទេសដែលមានសេដ្ឋកិច្ចធំជាងគេទីពីររបស់អាស៊ីអាគ្នេយ៍មួយនេះ។
អ្នកនាំពាក្យរដ្ឋាភិបាលថៃលោក Chai Wacharonke បាននិយាយថា គណៈកម្មាធិការមួយនឹងជួបប្រជុំគ្នានៅខែនេះ ដើម្បីវាយតម្លៃថាឧស្សាហកម្មណាដែលនឹងត្រូវរៀបចំសម្រាប់ការដំឡើងប្រាក់ឈ្នួលនេះ ហើយអ្វីដែលអាចផ្តល់ជាជំនួយដល់ឧស្សាហកម្មដែលមិនទាន់មានភាពរួចរាល់សម្រាប់ការដំឡើងនេះ។
សូជម្រាបថា ក្នុងសប្តាហ៍នេះ រដ្ឋាភិបាលថៃបានកាត់បន្ថយការព្យាករណ៍កំណើនសេដ្ឋកិច្ចសម្រាប់ឆ្នាំ ២០២៤របស់ខ្លួនមកត្រឹម ២,៤ភាគរយពីកម្រិត ២,៨ភាគរយ ប៉ុន្តែបានគូសបញ្ជាក់ថា កំណើននៅតែអាចឈានដល់ ៣,៣ភាគរយ ប្រសិនបើគម្រោងចែកប្រាក់តាមកាបូបឌីជីថលដែលមានទំហំ ៥០០ពាន់លានបាតអាចដំណើរការទៅមុខបានក្នុងត្រីមាសទីបួនតាមការរំពឹងទុកដោយវានឹងជួយជំរុញដល់ការចំណាយរបស់ប្រជាជន។
សូមរំលឹកថា កាលពីឆ្នាំមុន រដ្ឋាភិបាលថៃបានប្រកាសដំឡើងប្រាក់ឈ្នួលអប្បបរមាប្រចាំថ្ងៃក្នុងកម្រិត ២,៣៧ភាគរយពី ៣៣០បាត ទៅ ៣៧០បាត ប៉ុន្តែអត្រានេះត្រូវបានលោកនាយករដ្ឋមន្ត្រី ស្រ៊ីថា ថាវីស៊ីន ចាត់ទុកថាជាមានកម្រិតទាបពេក។
ក្នុងយុទ្ធនាការឃោសនាបោះឆ្នោតកាលពីឆ្នាំ២០២៣ គណបក្ស ភឿថៃ របស់លោក ស្រ៊ីថា ដែលជាបក្សកំពុងកាន់អំណាចបានប្រកាសដោយសន្យាថានឹងដំំឡើងប្រាក់ឈ្នួលអប្បបរមាឲ្យដល់ ៦០០បាតនៅឆ្នាំ ២០២៧៕