របបយោធាមីយ៉ាន់ម៉ាចេញវិធានការហាមឃាត់ពលរដ្ឋជាបុរសមិនឲ្យចេញទៅធ្វើការនៅបរទេស
ក្នុងសប្តាហ៍នេះ របបយោធាមីយ៉ាន់ម៉ាបានចេញសេចក្តីប្រកាសមួយស្តីពីការផ្អាកការចេញលិខិតអនុញ្ញាតឲ្យពលរដ្ឋជាបុរសស្នើសុំបែបបទចេញទៅធ្វើការនៅបរទេស ដោយវិធានការនេះត្រូវបានប្រកាសឡើងប៉ុន្មានសប្តាហ៍បន្ទាប់ពីការដាក់ឱ្យប្រើប្រាស់ច្បាប់យោធាដែលតម្រូវឲ្យពលរដ្ឋជាបុរសក្នុងប្រទេសនេះមានកាតព្វកិច្ចបម្រើក្នុងជួរកងទ័ព និងដែលបានជំរុញនាំឱ្យមនុស្សរាប់ពាន់នាក់ព្យាយាមចាកចេញពីប្រទេសនេះ។
សូមជម្រាបថា របបយោធាមីយ៉ាន់ម៉ាដែលកំពុងតស៊ូប្រយុទ្ធដើម្បីបង្រ្កាបក្រុមអ្នកតស៊ូដែលបានវាយដណ្តើមយកទីតាំងសំខាន់ៗមួយចំនួនក្នុងរយៈពេលចុងក្រោយនេះ កាលពីខែកុម្ភៈបានលើកឡើងថា ខ្លួននឹងអនុវត្តច្បាប់ដែលនឹងតម្រូវឲ្យពលរដ្ឋជាបុរសទាំងអស់ត្រូវចូលបម្រើក្នុងជួរយោធាយ៉ាងហោចណាស់ ០២ឆ្នាំ។
វិធានការខាងលើនេះបានជំរុញឲ្យមនុស្សរាប់ពាន់នាក់តម្រង់ជួរស្នើសុំទិដ្ឋាការនៅខាងក្រៅស្ថានទូតបរទេសនានាក្នុងរដ្ឋធានីយ៉ាំងហ្គោន ហើយចំនួនទៀតបានឆ្លងចូលទៅក្នុងប្រទេសថៃដែលជាប្រទេសជិតខាងដើម្បីគេចពីច្បាប់នេះ។
ក្នុងសេចក្តីថ្លែងការណ៍មួយដែលត្រូវបានបង្ហោះដោយក្រុមព័ត៌មានរបស់របបយោធាកាលពីល្ងាចថ្ងៃព្រហស្បតិ៍ទី ០២ ឧសភាសប្តាហ៍នេះ ក្រសួងការងារមីយ៉ាន់ម៉ាបានប្រកាសពីការផ្អាកជាបណ្ដោះអាសន្នសម្រាប់ការទទួលយកពាក្យស្នើសុំពីពលរដ្ឋជាបុរសដែលចង់ចេញទៅធ្វើការនៅបរទេស។
ក្រសួងខាងលើនេះបានបន្តថា វិធានការនេះគឺជារឿងចាំបាច់ក្នុងការចំណាយពេលវេលាបន្ថែមទៀតលើការផ្ទៀងផ្ទាត់ដំណើរការនៃការចាកចេញ និងបញ្ហាផ្សេងទៀតរបស់អ្នកស្នើសុំ ប៉ុន្តែមិនបានផ្តល់ព័ត៌មានលម្អិតនោះទេ។
យោងតាមការប៉ាន់ស្មានរបស់អង្គការពលកម្មអន្តរជាតិដែលដកស្រង់តួលេខពីរដ្ឋាភិបាលមុនបានឲ្យដឹងថា ក្នុងឆ្នាំ ២០២០ មានជនជាតិមីយ៉ាន់ម៉ាជាង ៤លាននាក់កំពុងធ្វើការនៅបរទេស ប៉ុន្តែអ្នកវិភាគជាច្រើនបាននិយាយថា មានអ្នកធ្វើការនៅបរទេសជាច្រើនមិនស្ថិតនៅក្នុងបញ្ជីខាងលើនេះនោះទេ ដែលនេះមានន័យថាចំនួនជាក់ស្តែងអាចនឹងលើសពីតួលេខខាងលើ។
គួរបញ្ជាក់ថា ច្បាប់ស្តីពីការចូលបម្រើយោធាត្រូវបានបង្កើតឡើងដោយរបបយោធាមុនក្នុងឆ្នាំ ២០១០ ប៉ុន្តែមិនដែលត្រូវបានដាក់ឱ្យចូលជាធរមានឡើយ។
ច្បាប់នោះអនុញ្ញាតឱ្យយោធាអាចកោះហៅពលរដ្ឋជាបុរសទាំងអស់ដែលមានអាយុពី ១៨ ដល់ ៣៥ឆ្នាំ និងស្ត្រីដែលមានអាយុពី ១៨ ដល់ ២៧ឆ្នាំឱ្យចូលបម្រើកងទ័ពយ៉ាងហោចណាស់ ០២ឆ្នាំ។
ក្រៅពីនេះ ច្បាប់នោះក៏មានចែងពីបទប្បញ្ញត្តិដែលលើកឡើងថា ក្នុងគ្រាដែលប្រទេសមានអាសន្ន លក្ខខណ្ឌនៃការបម្រើយោធាអាចបន្តរហូតដល់ ០៥ឆ្នាំ ហើយអ្នកដែលព្រងើយកន្តើយនឹងការកោះហៅឲ្យចូលបម្រើយោធាអាចត្រូវជាប់គុកក្នុងរយៈពេលដូចគ្នា៕