កម្ពុជា-អូស្រ្តាលី បន្តកិច្ចសហប្រតិបត្តិការត្រួតពិនិត្យគ្រឿងញៀនឆ្លងកាត់ព្រំដែន និងបណ្តុះបណ្តាលធនធានមនុស្ស
រាជធានីភ្នំពេញ៖ នាថ្ងៃទី៤ ខែសីហា ឆ្នាំ២០២០ នៅអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានទទួលជួប លោក អាន់តូនី ម៉ាខ្វៃ Anthony maguire តំណាងនគរបាលសហព័ន្ធអូស្រ្តាលីAFP អមស្ថានទូតអូស្រ្តាលីប្រចាំកម្ពុជា ដេីម្បីពិភាក្សាការងារ។
ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ បានមានប្រសាសន៍ថ្លែងអំណរគុណដល់រាជរដ្ឋាភិបាល និងប្រជាជនអូស្រ្តាលី ដែលបានចូលរួមសហប្រតិបត្តិលេីការងារបង្រ្កាបឧក្រិដ្ឋកម្មឆ្លងដែនពិសេសបទល្មេីសគ្រឿងញៀនឆ្លងកាត់ព្រំដែន ។
ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ ក៏បានថ្លែងជម្រាបជូនភាគីភ្ញៀវអំពីភាពជោគជ័យជាបន្តបន្ទាប់នៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់កម្ពុជា ដែលមិនមែនជាសង្រ្គាមប្រឆាំងគ្រឿងញៀន តែជាការប្រមូលផ្តុំនូវកំលាំងសរុបធ្វេីការដោះស្រាយបញ្ហាគ្រឿងញៀន ដែលរាល់ការបង្រ្កាបបទល្មេីសគ្រឿងញៀនត្រូវអនុវត្តស្របតាមច្បាប់ស្តីពីការត្រួតពិនិត្យគ្រឿងញៀន ហេីយជនប្រេីប្រាស់គ្រឿងញៀនគឺជាជនរងគ្រោះត្រូវបានលេីកទឹកចិត្តឱ្យទៅទទួលយកសេវាព្យាបាលអ្នកញៀនគ្រឿងញៀនដោយផ្អែកលេីសហគមន៍នៅតាមមន្ទីរពេទ្យជាតិ មន្ទីរពេទ្យបង្អែក និងមណ្ឌលសុខភាពដែលក្រសួងសុខាភិបាលបានបំពាក់សេវាព្យាបាលដោយឥតគិតថ្លៃចំនួន៤៥០កន្លែង និងបានស្នេីសុំឱ្យភាគីអូស្រ្តាលី បន្តជួយដល់កម្ពុជា លេីការងារកិច្ចសហប្រតិបត្តិការដែលមានពេលកន្លងមក។
ជាការឆ្លេីយតប លោក អាន់តូនី ម៉ាខ្វៃ Anthony maguire តំណាងនគបាលសហព័ន្ធអូស្រ្តាលីAFP អមស្ថានទូតអូស្រ្តាលីប្រចាំកម្ពុជា បានថ្លែងសាទរនូវលទ្ធផលការងារដែលកម្ពុជាខិតខំសម្រេចបាន ហេីយនឹងបន្តជួយដល់កម្ពុជាលេីការងារបណ្តុះបណ្តាលធនធានមនុស្សជំនាញស៊េីបអង្កេត ចារកម្ម និងការវិភាគព័ត៌មាន និងបន្តការគាំទ្រសកម្មភាពការិយាល័យទំនាក់ទំនងព្រំដែន BLO និងពិសោធន៍គ្រឿងញៀន។
