ក្រសួងសាធារណការដាក់ជញ្ជីងចល័ត ត្រួតពិនិត្យរថយន្តដឹកទំនិញផ្លូវជាតិលេខ៥ រកឃើញរថយន្តដឹកលើសទម្ងន់កំណត់៣គ្រឿង យកមកធ្វើការផាកពិន័យ
បន្ទាយមានជ័យ៖ ដើម្បីធានាដល់គុណភាពផ្លូវមានលក្ខណៈយូរអង្វែង ក្រុមការងារក្រសួងសាធារណៈការ និងដឹកជញ្ជូន ដឹកនាំដោយឯកឧត្តម សេង ឈួត រដ្ឋលេខាធិការក្រសួងសាធារណការនិងដឹកជញ្ជូន នឹងជាប្រធានគណៈកម្មការសម្របសម្រួលជញ្ជីងថ្លឹងរថយន្តចល័តទូទាំងប្រទេស រួមនឹងប្រតិភូអមដំណើរ លោក សុក ចាន់ថា ប្រធានមន្ទីរសាធារណការនិងដឹកជញ្ជូន បានដាក់ជញ្ជីងចល័ត ដើម្បីត្រួតពិនិត្យ ឃាត់រថយន្តដឹកលើសទម្ងន់កំណត់ ធ្វើដំណើរតាមដងផ្លូវជាតិលេខ៥ នៅត្រង់ចំនុចផ្លូវហាយវេ(ផ្លូវវាងក្រុង) នៅថ្ងៃទី៤ ខែកញ្ញា ឆ្នាំ២០២១ ។
ឯកឧត្តម សេង ឈួត រដ្ឋលេខាធិការ ក្រសួងសាធារណការ និងដឹកជញ្ជូន បានឲ្យដឹងថា ៖ ដោយអនុវត្តន៍តាមអនុសាសន៍របស់ ឯកឧត្តម ទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណៈការ ក្រុមការងារក្រសួងដឹកនាំដោយឯកឧត្តមផ្ទាល់ រួមជាមួយក្រុមការងារក្រសួង លោក សុក ចាន់ថា ប្រធានមន្ទីរសាធារណការនិងដឹកជញ្ជូន ខេត្តបន្ទាយមានជ័យ បានដាក់ជញ្ជីងចល័ត នៅចំណុចផ្លូវហាយវេ(ផ្លូវវាងក្រុង) ដើម្បីធ្វើការត្រួតពិនិត្យ រថយន្តធំៗដែលដឹកទំនិញលើសទម្ងន់កំណត់ ដែលជាហេតុធ្វើឲ្យគុណភាពផ្លូវមិនអាចទ្រាំទ្របាន ធ្វើឲ្យខូចផ្លូវ ដើម្បីយកទៅធ្វើការផាកពិន័យទៅតាមច្បាប់ដែលក្រសួងបានកំណត់ ចំពោះរថយន្តល្មើសដឹកលើសទម្ងន់ ។
ក្នុងនោះឯកឧត្តម រដ្ឋលេខាធិការ ក៏បានធ្វើការអំពាវនាវ ដល់ម្ចាស់យានយន្តធំៗដែលប្រើប្រាស់ផ្លូវថ្នល់ សូមចូលរួមជាមួយក្រសួង ក៏ដូចជាមន្ទីរ មេត្តាកុំដឹកលើសទម្ងន់ដែលក្រសួងបានកំណត់ ដែលជាហេតុធ្វើឲ្យខូចផ្លូវប្រើប្រាស់មិនបានយូរអង្វែង។ ក្នុងការត្រួតពិនិត្យនេះជាលទ្ធផលមួយព្រឹកក្រុមការងារក្រសួង បានរកឃើរថយន្តដែលល្មើសដឹកលើសទម្ងន់កំណត់ចំនួន៣គ្រឿង យកទៅធ្វើការផាកពិន័យតាមច្បាប់ ដែលទន្ទឹមនោះភាគច្រើនជាប្រភេទរថយន្តដឹកខ្សាច់ ដឹកថ្ម និងដឹកជីកសិកម្ម៕
