កម្មវិធីគ្រប់គ្រងរូបិយប័ណ្ណឌីជីថល “បាគង” របស់កម្ពុជាកើនចំនួនអ្នកប្រើប្រាស់ដល់ ១០លានគណនី
(ភ្នំពេញ)៖ ក្នុងបទសម្ភាសន៍មួយជាមួយសារព័ត៌មានជប៉ុន Nikkei Asia កាលពីថ្ងៃអង្គារ ទី១៩ ធ្នូ ឆ្នាំ២០២៣នេះ ទេសាភិបាលធនាគារកណ្តាលកម្ពុជា លោកជំទាវ ជា សេរី បានបញ្ជាក់ឱ្យដឹងថា គិតមកទល់ពេលនេះ កម្មវិធីគ្រប់គ្រងរូបិយប័ណ្ណឌីជីថល “បាគង” ដែលបង្កើតឡើងក្រោមកិច្ចសហការជាមួយក្រុមហ៊ុនបង្កើតថ្មីរបស់ជប៉ុន បានកើនចំនួនអ្នកប្រើប្រាស់ដល់ ១០លានហើយ។
របាយការណ៍បានបង្ហាញថា តួលេខនេះគឺជាសមទ្ធិផលដ៏សំខាន់មួយ ខណៈដែលចំនួននេះបានឲ្យឃើញថាប្រជាជនកម្ពុជាប្រមាណ ៦០ភាគរយមានសក្តានុពលក្នុងការប្រើប្រាស់កម្មវិធី “បាគង” នេះសម្រាប់ធ្វើប្រតិបត្តិការទូទាត់ការទិញទំនិញ និងសេវាកម្មផ្សេងៗ។
ជាមួយគ្នានេះ លោកជំទាវ ជា សេរី ក៏បានចែករំលែកពីផែនការសម្រាប់ពង្រីកសាខា “បាគង” ជាអន្តរជាតិផងដែរ ជាពិសេសតាមរយៈការសហការជាមួយ UnionPay International ដែលជាសេវាទូទាត់តាមកាតរបស់ប្រទេសចិន និងដៃគូផ្សេងទៀតក្នុងសកលលោក។
ជាងនេះទៅទៀត ធនាគារជាតិនៃកម្ពុជាក៏មានគោលបំណងពង្រឹងបណ្តាញទូទាត់ឆ្លងដែនសម្រាប់រូបិយប័ណ្ណឌីជីថលរបស់ខ្លួន ដោយជំរុញប្រតិបត្តិការឆ្លងព្រំដែនជាមួយប្រទេសដទៃដោយមិនទាមទារដំណើរការស្មុគស្មាញ។
នៅក្នុងបទសម្ភាសន៍ខាងលើ លោកជំទាវ ជា សេរី បានសង្កត់ធ្ងន់លើសារៈសំខាន់នៃការដាក់បញ្ចូលហិរញ្ញវត្ថុ ដោយបានគូសបញ្ជាក់ពីការប្តេជ្ញាចិត្តរបស់ធនាគារកណ្តាលក្នុងការពង្រឹងបន្ថែមទៀតនូវការដាក់បញ្ចូលហិរញ្ញវត្ថុដោយផ្តោតលើការការពារអ្នកប្រើប្រាស់ និងសន្តិសុខតាមប្រព័ន្ធអ៊ីនធឺណិត។
លើសពីនេះ លោកជំទាវបានឲ្យដឹងថា ធនាគារកណ្តាលបានចុះហត្ថលេខាលើអនុស្សរណៈនៃការយោគយល់ជាមួយ Alipay ដែលជាសេវាទូទាត់ឌីជីថលរបស់ Ant Group ដែលមានមូលដ្ឋានក្នុងប្រទេសចិន ហើយបានបង្កើតកិច្ចសហប្រតិបត្តិការជាមួយធនាគារកណ្តាលនៃកោះ សូឡូម៉ុន (Solomon Islands) ធនាគារបម្រុង Fiji និងធនាគារជាតិនៃប្រទេសរវ៉ាន់ដាផងដែរ។
យោងតាមការបញ្ជាក់របស់សារព័ត៌មានជប៉ុន Nikkei Asia ធនាគារជាតិនៃកម្ពុជាក៏បានចុះហត្ថលេខាលើអនុស្សរណៈនៃកិច្ចសហប្រតិបត្តិការជាមួយក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុនផងដែរ ដោយដាក់មូលដ្ឋានគ្រឹះសម្រាប់ការទូទាត់តាម QR code រវាងប្រទេសទាំងពីរ។
សូមជម្រាបថា ចាប់តាំងពីបើកដំណើរការកាលពីឆ្នាំ២០២០ “បាគង” គឺជាសមទ្ធិផលនៃកិច្ចសហការរវាងធនាគារកណ្តាលរបស់កម្ពុជា និងធនាគារពាណិជ្ជរាប់សិប ជាមួយនឹងការបង្កើតឡើងបែប blockchain ដែលត្រូវបានរចនាដោយក្រុមហ៊ុនបច្ចេកវិទ្យាជប៉ុនឈ្មោះ Soramitsu Co.។
ដោយមើលឃើញពីកំណើននៃការប្រើប្រាស់ទូរស័ព្ទឆ្លាតវៃ ឫស្មាតហ្វូនយ៉ាងទូលំទូលាយនៅក្នុងប្រទេសកម្ពុជា ធនាគារកណ្តាលមានគោលបំណងប្រើប្រាស់កម្មវិធី “បាគង” នេះ ជាដំណោះស្រាយសម្រាប់ការនាំយកសេវាធនាគារដល់ប្រជាជនដែលមិនមានធនាគារនៅតាមមូលដ្ឋានរបស់ខ្លួន។ ស្រដៀងទៅនឹងប្រទេសអាស៊ីអាគ្នេយ៍ជាច្រើនដែរ កម្ពុជាប្រឈមមុខនឹងបញ្ហាធំមួយ ដោយមួយភាគធំនៃប្រជាជនរបស់ខ្លួនខ្វះលទ្ធភាពទទួលបានសេវាធនាគារសំខាន់ៗ៕