ហ្វីលីពីនព្រមានពីកម្រិតគ្រោះថ្នាក់នៃសីតុណ្ហភាពដែលអាចឡើងដល់កម្រិត ៥១អង្សា
(ម៉ានីល)៖ នៅថ្ងៃចន្ទ ទី០៨ ខែមេសាដើមសប្តាហ៍នេះ ការិយាល័យអាកាសធាតុជាតិរបស់ហ្វីលីពីនបានធ្វើការព្រមានអំពីសន្ទស្សន៍កំដៅដែលអាចកើនដល់កម្រិត ៥១អង្សាសេនៅក្នុងតំបន់យ៉ាងហោចណាស់ចំនួន ០៩នៅទូទាំងប្រទេស ហើយបានចាត់ថ្នាក់តំបន់ទាំងនោះថាជា “តំបន់គ្រោះថ្នាក់ខ្លាំង” ដែលមានសីតុណ្ហភាពចាប់ពីចន្លោះ ៤២ ដល់ ៥១ អង្សាសេ។
ដោយឡែក ចំណែកផ្នែកផ្សេងទៀតនៃប្រទេសអាស៊ីអាគ្នេយ៍នេះ គឺស្ថិតនៅក្រោមកម្រិតនៃការប្រុងប្រយ័ត្នខ្លាំងដោយមានសីតុណ្ហភាពចាប់ពី ៣៣ ទៅ ៤១ អង្សាសេ។ ប៉ុន្តែការិយាល័យខាងលើនេះបានព្រមានថា ជំងឺដាច់សរសៃឈាមដោយសារអាកាសធាតុក្តៅខ្លាំងគឺជារឿងត្រូវប្រុងប្រយ័ត្ន ហើយនឹងបន្តមានផលប៉ះពាល់ដល់មនុស្សគ្រប់វ័យ។
ដើម្បីជៀសវាងផលវិបាកដែលអាចកើតមានពីកំដៅខ្លាំង ការិយាល័យខាងលើបានណែនាំសាធារណៈជនឱ្យកាត់បន្ថយសកម្មភាពនៅក្រៅផ្ទះ និងផឹកទឹកឱ្យបានច្រើន។
ទន្ទឹមគ្នានេះ រដ្ឋាភិបាលបានអនុញ្ញាតឱ្យសាលារៀនមួយចំនួនអនុវត្តការបង្រៀនតាមប្រព័ន្ធអនឡាញដើម្បីការពារសិស្ស ជាពិសេសកុមារពីសន្ទស្សន៍កំដៅខ្ពស់ដែលកំពុងបន្តកើនឡើងក្នុងពេលនេះ៕
