គម្រោងកែលម្អ បរិស្ថាន ជុំវិញទន្លេសាប ជំហាន២ ក្នុងក្រុងសិរីសោភ័ណ សម្រេចបានប្រមាណ៥០%ហេីយ ក្នុងទំហំទឹកប្រាក់២២លានដុល្លារ
បន្ទាយមានជ័យ ៖ គម្រោងកែលម្អ បរិស្ថាន ជុំវិញទន្លេសាប ជំហាន២ សម្រាប់ក្រុងសិរីសោភ័ណ អនុវត្តសម្រេចបានប្រមាណ៥០%ហេីយ ដែលជាកម្ចីហិរញ្ញប្បទាន ADB ក្នុងទំហំទឹកប្រាក់២២លានដុល្លារអាមេរិក ដេីម្បីកែលម្អក្រុងមួយនេះឱ្យទៅជាទីក្រុងមួយស្រស់ស្អាត ប្រដោយផាសុខភាព។
ជាក់ស្តែងនៅថ្ងៃពុធ ៧ កើត ខែស្រាពណ៍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៣ ខែសីហា ឆ្នាំ២០២៣ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញចុះពិនិត្យមើលក្រុមការងារអនុវត្ត “ គម្រោងកែលម្អ បរិស្ថាន ជុំវិញទន្លេសាបជំហាន២” ក្នុងក្រុងសិរីសោភ័ណដែលកំពុងអនុវត្ត និងបានធ្វេីការជួសជុលផ្លូវឡើងវិញជាបណ្តេីរៗ នូវហេដ្ឋារចនាសម្ព័ន្ធដែលរងផលប៉ះពាល់ដោយសារគម្រោង នៅក្នុងនៅភូមិតារាងបាល់ (ផ្លូវ យ៊ាំង ម៉េងតុល)សង្កាត់កំពង់ស្វាយ ក្រុងសិរីសោភ័ណ។
បេីតាមការបញ្ជាក់ពីមន្ត្រីជំនាញ រដ្ឋបាលក្រុងសិរីសោភ័ណបាន ឱ្យដឹងថា ការអនុវត្តគម្រោងកែលម្អ បរិស្ថាន ជុំវិញទន្លេសាប ជំហាន២ សម្រាប់ក្រុងសិរីសោភ័ណ មានអនុគម្រោង២ ៖ អនុគម្រោងទី១ កែលម្អប្រព័ន្ធលូទឹកកង្វក់(ប្រភេទលូ អ៊ុយ) និងអាងចម្រុះ និងអនុទី២ កែលម្អទីលានចាក់សំរាម (អនុវត្តជំហានបន្ទាប់ ឆ្នាំ២០២៤)។
មន្ត្រីដ៏ដែលបន្តថា អនុគម្រោងទី១ ត្រូវបានអនុវត្ត ភ្ជាប់ប្រព័ន្ធលូតាមផ្ទះ ក្នុងផែនការគម្រោងទូទាំងក្រុង មាន៤សង្កាត់រួមមាន សង្កាត់កំពង់ស្វាយ សង្កាត់ព្រះពន្លា សង្កាត់អូរអំបិល និងសង្កាត់ទឹកថ្លា ដែលបានប្រវែងចំនួន១១២គីឡូម៉ែត្រ។ បច្ចុប្បន្ននេះអនុវត្តសម្រេចបានចំនួន៥០%ហេីយ គ្រោងបញ្ចប់ក្នុងកំឡុងខែកញ្ញា ឆ្នាំ២០២៤នាពេលខាងមុខ។ ដោយឡែកចំពោះគម្រោងដែលបានអនុវត្តរួច អ្វីដែលធ្វេីប៉ះពាល់ ជាពិសេសហេដ្ឋារចនាសម្ព័ន្ធ ក្រុមការងារនិងធ្វេីការជួសជុលឡេីងវិញទាំងអស់។ ចំពោះអត្ថប្រយោជន៍ ដែលពលរដ្ឋទទួលបាន ១-ការតភ្ជាប់ជូនឥតគិតថ្លៃ, ២- ពលរដ្ឋលែងព្រួយបារម្ភស្ទះបង្គន់ ស្ទះប្រព័ន្ធលូទឹក, ៣-បរិស្ថាននៅជុំវិញផ្ទះស្អាត គ្មានក្លិនស្អុយ, ៤-ទឹកកង្វក់ត្រូវបានចម្រុះ មុនបញ្ចូលទៅក្នុងស្ទឹង ដែលមិនប៉ះពាល់មច្ឆាជាតិឡេីយ៕