ម៉ាឡេស៊ីបញ្ជាឱ្យ Meta និង TikTok បង្កើតផែនការសម្រាប់មាតិកាដែលបង្កគ្រោះថ្នាក់
(គូឡាឡាំពួរ)៖ យោងតាមការបញ្ជាក់របស់អាជ្ញាធរម៉ាឡេស៊ីនៅថ្ងៃអង្គារសប្តាហ៍នេះបានឲ្យដឹងថា ម៉ាឡេស៊ីបានបញ្ជាឱ្យក្រុមហ៊ុនបច្ចេកវិទ្យា Meta របស់អាមេរិកនិង TikTok របស់ចិនឲ្យបង្ហាញផែនការក្នុងការប្រយុទ្ធប្រឆាំងនឹងមាតិកាដែលបង្កគ្រោះថ្នាក់នៅលើអ៊ីនធឺណិត បន្ទាប់ពីប្រទេសនេះបានរាយការណ៍ពីការកើនឡើងនៃមាតិកាបែបជេរប្រមាថនៅលើប្រព័ន្ធផ្សព្វផ្សាយសង្គម។
លើកឡើងនៅក្នុងសន្និសិទសារព័ត៌មានកាលពីថ្ងៃអង្គារ គណៈកម្មាធិការទំនាក់ទំនង និងប្រព័ន្ធផ្សព្វផ្សាយ ព្រមជាមួយស្ថាប័នប៉ូលិសជាតិបានឲ្យដឹងថា រដ្ឋាភិបាលបានរាយការណ៍ពីករណីខាងលើជាង ៥០,០០០នៅលើវេទិកាប្រព័ន្ធផ្សព្វផ្សាយសង្គមផ្សេងៗ ដែលរួមមានទាំង Facebook របស់ក្រុមហ៊ុន Meta និង TikTok ផងដែរក្នុងរយៈពេលបីខែដំបូងនៃឆ្នាំនេះ ខណៈដែលចំនួនករណីរសរុបដែលត្រូវបានកត់ត្រាកាលពីឆ្នាំមុនមានប្រហែល ៤៣,០០០ករណី។
ជុំវិញបញ្ហានេះ អាជ្ញាធរបានបញ្ជាក់ថាខ្លួនការព្រួយបារម្ភជាពិសេសចំពោះមាតិកាណាដែលទាក់ទងនឹងពូជសាសន៍ សាសនា និងរាជវង្ស។
សូមជម្រាបថា ក្រុមហ៊ុនបច្ចេកវិទ្យាទាំងពីរបានចូលរួមកិច្ចប្រជុំមួយដែលដឹកនាំដោយរដ្ឋមន្ត្រីទំនាក់ទំនងម៉ាឡេស៊ី លោក Fahmi Fadzil កាលពីថ្ងៃចន្ទ ហើយត្រូវបានប្រាប់ឱ្យបង្កើនកិច្ចខិតខំប្រឹងប្រែងត្រួតពិនិត្យ ដោយរួមមានទាំងការដកចេញនូវការផ្សព្វផ្សាយនានាដែលពាក់ព័ន្ធនឹងការបោកប្រាស់ និងល្បែងស៊ីសងខុសច្បាប់ផងដែរ។
មុននេះ រដ្ឋាភិបាលម៉ាឡេស៊ីធ្លាប់បានចោទប្រកាន់ក្រុមហ៊ុនប្រព័ន្ធផ្សព្វផ្សាយសង្គមទាំងពីរខាងលើនេះថា មិនបានធ្វើសកម្មភាពទាន់ពេលវេលាលើអ្វីដែលខ្លួនបានចាត់ទុកថាជាមាតិកាបង្កគ្រោះថ្នាក់៕
