ហ្វីលីពីនសម្លឹងមើលកិច្ចព្រមព្រៀងទំហំ ១០០ពាន់លានដុល្លារពីជំនួបកំពូលជាមួយសហរដ្ឋអាមេរិក និងជប៉ុនក្នុងសប្តាហ៍នេះ
(ម៉ានីល)៖ យោងតាមសេចក្តីថ្លែងការណ៍របស់ការិយាល័យប្រធានាធិបតីហ្វីលីពីននៅថ្ងៃព្រហស្បតិ៍នេះដោយដកស្រង់សម្តីឯកអគ្គរដ្ឋទូតប្រចាំទីក្រុងវ៉ាស៊ីនតោនបានឲ្យដឹងថា រដ្ឋាភិបាលហ្វីលីពីនកំពុងសម្លឹងមើលកិច្ចព្រមព្រៀងវិនិយោគទំហំ ១០០ពាន់លានដុល្លារក្នុងរយៈពេល ០៥ទៅ ១០ឆ្នាំខាងមុខពីកិច្ចប្រជុំកំពូលត្រីភាគីជាមួយសហរដ្ឋអាមេរិក និងជប៉ុននៅទឹកដីអាមេរិកក្នុងសប្តាហ៍នេះ។
សេចក្តីថ្លែងការណ៍ខាងលើបានឲ្យដឹងថា ការវិនិយោគនេះនឹងគ្របដណ្តប់លើវិស័យផ្សេងៗដែលរួមមានទាំងថាមពល និងហេដ្ឋារចនាសម្ព័ន្ធឌីជីថលផងដែរ។
សូមជម្រាបថា នៅព្រឹកថ្ងៃព្រហស្បតិ៍នេះ ប្រធានាធិបតីហ្វីលីពីន លោក Ferdinand Marcos Jr បានធ្វើដំណើរទៅដល់ទីក្រុងវ៉ាស៊ីនតោន សហរដ្ឋអាមេរិកក្នុងដំណើរទស្សនកិច្ចការងាររយៈពេល ០២ថ្ងៃសម្រាប់កិច្ចប្រជុំត្រីភាគីជាលើកដំបូងជាមួយសមភាគីអាមេរិក និងជប៉ុននៅថ្ងៃសុក្រស្អែកនេះ។
ជំនួបខាងលើនឹងផ្តោតសំខាន់លើការបង្កើនកិច្ចសហប្រតិបត្តិការសេដ្ឋកិច្ច និងដែនសមុទ្រនៃប្រទេសទាំងបី ខណៈដែលក្នុងរយៈពេលចុងក្រោយនេះ ទំនាក់ទំនងរវាងហ្វីលីពីន និងចិនបានធ្លាក់ចូលក្នុងភាពតានតឹងជាបន្តបន្ទាប់ដោយសារការប៉ះទង្គិចគ្នារវាងកងកម្លាំងប្រទេសទាំងពីរនៅតំបន់មានជម្លោះក្នុងសមុទ្រចិនខាងត្បូង៕