បក្សកុម្មុយនិស្តវៀតណាមអនុម័តសំណើលាលែងពីតំណែងរបស់ប្រធានរដ្ឋសភា
ក្នុងសម័យប្រជុំវិសាមញ្ញរបស់រដ្ឋសភាវៀតណាមនៅថ្ងៃសុក្រនេះ គណៈកម្មាធិការមជ្ឈិមបក្សកុម្មុយនិស្តវៀតណាមបានអនុម័តលើសំណើលាលែងពីតំណែងរបស់ ប្រធានសភាជាតិនិតិកាលទី ១៥ លោក Vuong Dinh Hue ស្របតាមសំណើផ្ទាល់ខ្លួនរបស់លោក ដោយសេចក្តីប្រកាសនេះត្រូវបានធ្វើឡើងភ្លាមៗដោយការិយាល័យរបស់គណៈកម្មាធិការមជ្ឈិមបក្សកុម្មុយនិស្តបន្ទាប់ពីកិច្ចប្រជុំខាងលើ។
របាយការណ៍របស់គណៈកម្មាធិការត្រួតពិនិត្យមជ្ឈិម និងអាជ្ញាធរផ្សេងទៀតបានលើកឡើងថា លោក Hueដែលត្រូវបានចាត់ទុកថាជាមេដឹកនាំសំខាន់របស់បក្ស និងរដ្ឋរបស់ប្រទេសវៀតណាមបានបំពានបទប្បញ្ញត្តិរបស់បក្ស ដែលបានធ្វើឲ្យប៉ះពាល់ដល់កេរ្តិ៍ឈ្មោះរបស់បក្ស រដ្ឋ និងខ្លួនលោកផ្ទាល់។
គណៈកម្មាធិការខាងលើបានបន្តថា ដោយដឹងពីការទទួលខុសត្រូវរបស់លោកចំពោះមុខបក្ស រដ្ឋ និងប្រជាជន លោក Hue សម្រេចស្នើសុំលាលែងពីមុខតំណែងទាំងអស់របស់លោក។
សូមជម្រាបថា លោក Hue វ័យ ៦៧ឆ្នាំគឺជាសាស្រ្តាចារ្យដែលបានបញ្ចប់ថ្នាក់បណ្ឌិតផ្នែកសេដ្ឋកិច្ច។
លោកបានចំណាយពេល ២២ឆ្នាំក្នុងការបង្រៀន និងគ្រប់គ្រងនៅសាកលវិទ្យាល័យ Hanoi University of Finance and Accounting ដែលបច្ចុប្បន្នជាបណ្ឌិតសភាហិរញ្ញវត្ថុវៀតណាម មុនពេលក្លាយជាអគ្គសវនករពីឆ្នាំ 2006 ដល់ឆ្នាំ 2011។
លោក Hueធ្លាប់ជាសមាជិកការិយាល័យនយោបាយ និងគណៈកម្មាធិការមជ្ឈិមបក្សជាច្រើនអាណត្តិ ហើយលោកធ្លាប់កាន់តួនាទីជារដ្ឋមន្ត្រីក្រសួងហិរញ្ញវត្ថុពីឆ្នាំ ២០១១ ដល់ឆ្នាំ ២០១៣ ជាប្រធានគណៈកម្មការសេដ្ឋកិច្ចពីឆ្នាំ ២០១២ ដល់ឆ្នាំ ២០១៦ និងជាឧបនាយករដ្ឋមន្ត្រីពីឆ្នាំ ២០១៦ ដល់ឆ្នាំ ២០២០។
លោកត្រូវបានតែងតាំងជាលេខាបក្សទីក្រុងហាណូយក្នុងខែកុម្ភៈ ឆ្នាំ ២០២០ មុនពេលឡើងកាន់តួនាទីជាប្រធានរដ្ឋសភានៅខែមីនា ឆ្នាំ ២០២១៕
ប្រភព៖ VN Express International