សត្វជ្រូករស់ចំនួន២២ក្បាល ដឹកចូលពីប្រទេសថៃតាមច្រកទំនប់ដាច់ត្រូវបានអគ្គនាយកដ្ឋានសុខភាពសត្វឃាត់បញ្ជូនតាមនិតិវិធីច្បាប់
ខេត្តបន្ទាយមានជ័យ ៖ សត្វជ្រូករស់ចំនួន២២ក្បាលដឹកតាមរថយន្ត១គ្រឿងចេញពីស្រុកថៃត្រង់ចំណុចច្រកទំនប់ដាច់ ក្នុងភូមិសាស្ត្រឃុំអូរបីជាន់ ស្រុកអូរជ្រៅ ត្រូវបានលោកតាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វ រួមទាំងក្រុមការងារ បង្ក្រាបនៅវេលាម៉ោង១ទាបភ្លឺ ថ្ងៃទី៣១ ខែកក្កដា ឆ្នាំ២០២០ លើផ្លូវជាតិលេខ៥ ភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ។
លោកតាន់ ផាន់ណារ៉ា បានប្រាប់ ឲ្យដឹងថា៖ការឃាត់រថយន្តលួចដឹកជ្រូកមកពីស្រុកថៃនោះម៉ាកSANGYOUG ពណ៌សម្បកឪឡឹក ជាប្រភេទរថយន្តដឹកអ្នកដំណើ១២កៅអី ពាក់ស្លាកលេខភ្នំពេញ2J-3410 មានផ្ទុកសត្វជ្រូករស់ចំនួន២២ក្បាល លួចនាំពីប្រទេសថៃតាមច្រកទំនប់ដាច់យកទៅលក់ចែកចាយនៅខេត្តសៀមរាប ដោយគ្មានច្បាប់អនុញ្ញាតអ្វីទាំងអស់ ហើយការឃាត់រថយន្តលួចដឹកជ្រូកនោះបានដោយសហការជាមួយក្រុមការងារអន្តរាគមន៍បង្ក្រាបបទល្មើសចលនាសត្វ របស់អគ្គនាយកដ្ឋានសុខភាពសត្វក្រុមការងារអន្តរាគមន៍បង្ក្រាបបទល្មើសចលនាសត្វរបស់ការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្តបន្ទាយមានជ័យ និងកងរាជអាវុធហត្ថលើផ្ទៃប្រទេសផងដែរ។
លោកតាន់ ផាន់ណារ៉ា ក៏បានបញ្ជាក់ឲ្យដឹងទៀតថា៖បន្ទាប់ពីសមត្ថកិច្ចជំនាញ បាននាំយកវត្ថុតាងខាងលើមកបង្ខាំងទុកនៅកន្លែងចត្តាឡីស័កនៃការិយាល័យនៃមន្ទីរកសិកម្មខេត្តដើម្បីយកសំណាកវិភាគផ្ញើទៅអគ្គនាយកដ្ឋានសុខភាពសត្វ និងផលិតកម្មសត្វ ដើម្បីរងចាំអនុវត្តនីតិវិធីនិងផាកពិន័យ ។ ម្យ៉ាងវិញទៀតការទប់ស្កាត់បង្ក្រាបនេះ ជាការទទួលខុសត្រូវក្នុងតួនាទី ភារកិចមន្ត្រីជំនាញពេទ្យសត្វ និងជាការអនុវត្តតាមការណែនាំរបស់ឯកឧត្តមរដ្ឋមន្ត្រីក្រសួងកសិកម្ម រុក្ខប្រមាញ់និងនេសាទ។ហើយវិធានការនេះ ត្រូវបានបង្កើនឡើងក្នុងឱកាសឈ្មួញលួចនាំចូលមាន់រស់ ក៏ដូចផលិតផលពីបក្សី សត្វជ្រូក គោក្របីឬបទល្មើសផ្សេងទៀត នៅតាមច្រករបៀងផ្សេងៗគឺជាការអនុវត្តផ្ទុយទាំងស្រុងពីគោលការណ៍ណែនាំរបស់ក្រសួងមហាផ្ទៃក៏ដូចការណែនាំ ដាក់បញ្ជាបន្ថែមរបស់គណៈបញ្ជាការឯកភពរដ្ឋបាលខេត្តនិងមន្ត្រីជំនាញពេទ្យសត្វទៀតផង ៕
